មកដល់ពេលនេះ គម្រោងដែលចង់បង្កើតឲ្យមានការដឹកជញ្ជូនមន្ត្រីរាជការ និងប្រជាពលរដ្ឋរួមគ្នា ដែលស្របតាមការរៀបចំរបស់សាលាក្រុងភ្នំពេញតាំងពីយូរមកហើយក្នុងការសន្សំសំចៃប្រេងសាំងដែលចេះតែកើនឡើងថ្លៃកំពុងតែដំណើរការសិក្សា។ សាលាក្រុងភ្នំពេញកំពុងទទួលស្គាល់ថា គម្រោងនេះ គឺជាបញ្ហាមួយដែលត្រូវមានផែនការរៀបចំឲ្យបានម៉ត់ចត់បន្ថែមទៀតដើម្បីស្វែងរកថវិកាបម្រុងសម្រាប់ទប់ទល់នឹងការចំណាយថ្លៃដឹកជញ្ជូនមន្ត្រីរាជការ និងប្រជាពលរដ្ឋរួមគ្នាជាដើម។
លោក កែប ជុតិមា អភិបាលរាជធានីភ្នំពេញបានមានប្រសាសន៍កាលពីថ្ងៃទី១៤ កក្កដា ឲ្យដឹងថា៖ "គម្រោងដឹកជញ្ជូនមន្ត្រីរាជការរួមនេះ សាលាក្រុងកំពុងរង់ចាំបន្ទាប់ពីថ្ងៃបោះឆ្នោតហើយ។ ក្នុងរយៈពេល២-៣ ថ្ងៃមុនយើងបានធ្វើការស្នើសុំមិនឲ្យមានការដំឡើងថ្លៃធ្វើដំណើរទេ"។ លោកបានបន្តថា៖ "ការរៀបចំឲ្យមានគម្រោងនេះ វាគឺជាបញ្ហាមួយដែលយើងត្រូវរៀបចំផែនការឲ្យបានម៉ត់ចត់ណាស់សម្រាប់ការដឹកជញ្ជូនរួម ព្រោះថា កាលពីរយៈពេល ៥ឆ្នាំមុននោះ គម្រោងដឹកជញ្ជូនប្រជាពលរដ្ឋតាមឡានបឺស ត្រូវបានទទួលការបរាជ័យម្ដងរួចហើយ ដូច្នេះយើងត្រូវតែមានថវិកាបម្រុងទុកមុនមានន័យថា នេះគឺត្រូវតែមានការឧបត្ថម្ភធន"។ លោក កែប ជុតិមា បានធ្វើការគូសបញ្ជាក់ថា ចំពោះគម្រោងដឹកជញ្ជូននេះ ប្រទេសកម្ពុជាត្រូវតែកើតមានសម្រាប់ពេលអនាគត ដូច្នេះនៅក្នុងគម្រោងនេះ យើងត្រូវរៀបចំដំណើរការឲ្យបានត្រឹមត្រូវ និងល្អិតល្អន់ ដោយក្នុងនោះ ១០០%រដ្ឋាភិបាលត្រូវតែជួយទប់ទល់នឹងការបង់ខាតចំពោះការឧបត្ថម្ភធននៅពេលដែលចាប់ផ្ដើមដំណើរការគម្រោងនេះនាពេលអនាគត។
លោក នី ចរិយា ប្រធានផ្នែកអង្កេតសមាគមអាដហុកការពារសិទ្ធិមនុស្ស និងអភិវឌ្ឍន៍នៅកម្ពុជា បានមានប្រសាសន៍ឲ្យដឹកកាលពីថ្ងៃម្សិលមិញថា៖ "ទាក់ទងនឹងការបង្កើតឡានក្រុងសាធារណៈនេះ ប្រទេសណាក៏គេបានរៀបចំឲ្យមានដែរ ហើយវាក៏ជាមធ្យោបាយល្អសម្រាប់ការធ្វើដំណើរដើម្បីឲ្យប្រជាពលរដ្ឋគាត់អាចធ្វើដំណើរទៅណាមកណាបានដោយងាយ ដោយមិនចាំបាច់ប្រើប្រាស់មធ្យោបាយផ្ទាល់ខ្លួន ព្រោះថាប្រជាពលរដ្ឋខ្លះពុំមានលទ្ធភាពក្នុងការប្រើប្រាស់មធ្យោបាយផ្ទាល់ខ្លួន ដូច្នេះនេះក៏ជាការសម្រួលមួយដល់ចរាចរណ៍ក្នុងការធ្វើដំណើរដែរ"។ លោកបានគូសបញ្ជាក់ថា៖ "ប៉ុន្តែកន្លងមកខ្ញុំបានឮថា សាលាក្រុងមានគម្រោងធ្វើជារថយន្តសម្រាប់ដឹកមន្ត្រីរាជការនៅតាមស្ថាប័ននីមួយៗ ប្រសិនបើសាលាក្រុងមានគម្រោងសម្រាប់ដឹកមន្ត្រីរាជការដាច់មុខនៅតាមស្ថាប័ន ក្រសួងនីមួយៗមែនគឺខ្ញុំយល់ថា ការធ្វើបែបនេះ គឺវាប្រាកដជាខុសតែម្ដង។ ព្រោះថា សម្រាប់មន្ត្រីរាជការនៅតាមក្រសួងនីមួយៗគាត់មិនដែលនៅផ្ដុំគ្នាមួយកន្លែងនោះទេ ដូច្នេះយើងគិតថា ទម្រាំតែបានដឹកជញ្ជូនដល់ស្ថាប័នក្រសួងនីមួយៗនោះ គឺដល់ពេលចេញទៅផ្ទះវិញតែម្ដង។ ទាំងនេះមានន័យថា បុគ្គលិកមន្ត្រីរាជការនៅតាមស្ថាប័នក្រសួងផ្សេងៗពុំមានពេលវេលាគ្រប់គ្រាន់ក្នុងការបំពេញការនោះទេ"។
លោក ស្រីទឹម ដាឡាត់ មន្ត្រីមន្ទីរអប់រំយុវជន និងកីឡារាជធានីភ្នំពេញបានមានប្រសាសន៍ឲ្យដឹងថា វាជាការប្រសើរណាស់ដែលសាលាក្រុងមានគម្រោងចង់បង្កើតឲ្យមានការដឹកជញ្ជូនរួមទាំងមន្ត្រីរាជការ និងប្រជាពលរដ្ឋដើម្បីចូលរួមកាត់បន្ថយតម្លៃប្រេងសាំងនៅប្រទេសកម្ពុជាយើង។ ប៉ុន្តែបញ្ហាដែលត្រូវចោទឡើងនោះ ថាតើតម្លៃនៃការដឹកជញ្ជូននោះ បានធ្វើឡើងក្នុងកម្រិតប៉ុណ្ណាដែរ? ព្រោះរដ្ឋាភិបាលយើងគួរដឹងថា បច្ចុប្បន្ននេះប្រាក់បៀវត្សរ៍របស់មន្ត្រីរាជការពុំសូវមានលក្ខណៈគ្រប់គ្រាន់ប៉ុន្មាននោះទេ ដូច្នេះខ្ញុំមានការរីករាយកាលដែលសាលាក្រុងបានរៀបចំឲ្យមានសណ្ដាប់ធ្នាប់នៅក្នុងទីក្រុងភ្នំពេញ ប៉ុន្តែដូចដែលបានបញ្ជាក់ពីខាងលើរួចមកហើយដែរ ថាតើមន្ត្រីរាជការ និងរដ្ឋាភិបាលគួរតែត្រូវចំណាយបដិភាគប៉ុន្មានសម្រាប់ការដឹកជញ្ជូននេះ។
លោកស្រី ពុង ឈីវកេក នាយិកាអង្គការសិទ្ធិមនុស្សលីកាដូបានមានប្រសាសន៍ថា៖ "ខ្ញុំសូមស្វាគមន៍ចំពោះគម្រោងរបស់សាលាក្រុងដែលមានបំណងចង់បង្កើតឲ្យមានជាការដឹកជញ្ជូនរួមគ្នានេះសម្រាប់ប្រជាពលរដ្ឋ និងមន្ត្រីរាជការ"។ លោកស្រីបានបន្តថា៖ "ប្រសិនបើប្រជាពលរដ្ឋ និងមន្ត្រីរាជការនាំគ្នាជិះឡានបឺសដែលមានចំនួនប្រមាណ ២០-៣០នាក់ ឡានតែមួយគឺវាមិនអាចធ្វើឲ្យមានការរកស្ទះដល់ការធ្វើចរាចរណ៍នោះទេ"។ លោកស្រីបានគូសបញ្ជាក់ថា ការបង្កើតឲ្យមានការដឹកជញ្ជូនរួមនេះ វាក៏អាចជាការចូលរួមចំណែកក្នុងការជួយកាត់បន្ថយការចំណាយថ្លៃសាំងធ្វើដំណើររបស់មន្ត្រីរាជការ និងប្រជាពលរដ្ឋដែរ ប៉ុន្តែប្រសិនបើបង្កើតឡានបឺសនេះមែនហើយអ្នកធ្វើដំណើរត្រូវបង់ថ្លៃតែតម្លៃ ១០០-២០០រៀលនោះ វាគឺជាការប្រសើរណាស់៕