ឆ្លើយតបជាមួយនិងគោលការណ៍របស់រដ្ឋាភិបាលខ្មែរក្នុងការសម្រេចបន្ថែមប្រាក់បំណាច់ពីរម៉ឺនរៀលទៅលើប្រាក់បៀវត្សរ៍របស់មន្ត្រីរាជការ ប៉ូលិស ទាហាននៅទូទាំងប្រទេសដោយគិតចាប់ពីខែកក្កដានេះ រហូតដល់ខែធ្នូ មន្ត្រីដែលកំពុងបម្រើការងារនៅតាមក្រសួង និងមន្ទីរផ្សេងៗបានស្វាគមន៍ចំពោះការសម្រេចបន្ថែមនេះ។ ប៉ុន្តែមន្ត្រីទាំងនោះបានលើកឡើងថា រដ្ឋាភិបាលមិនចាំបាច់ធ្វើការបន្ថែមប្រាក់បំណាច់មកដល់មន្ត្រីរាជការសម្រាប់ពេលនេះទេ ប៉ុន្តែសំខាន់បំផុតរដ្ឋាភិបាលគួរតែធ្វើយ៉ាងណាទប់ស្កាត់ចំពោះតម្លៃទំនិញដែលចេះតែឡើងថ្លៃនៅក្នុងពេលបច្ចុប្បន្ននេះប្រសើរជាង។
លោកស្រី ទឹម ដាឡាត់ មន្ត្រីមន្ទីរអប់រំយុវជន និងកីឡារាជធានីភ្នំពេញ បានឲ្យដឹងកាលពីថ្ងៃទី២៣កក្កដាថា៖ "ចំពោះខ្ញុំដែលជាមន្ត្រីរាជការមួយរូបមានការត្រេកអរណាស់ដែលរដ្ឋាភិបាលមានគោលការណ៍សម្រេចឧបត្ថម្ភបន្ថែមលើប្រាក់បៀវត្សរ៍ដល់មន្ត្រីរាជការ។ ប៉ុន្តែតាមបទពិសោធន៍ដែលខ្ញុំធ្លាប់ជួបកន្លងមក នៅពេលដែលរដ្ឋាភិបាលបម្រុងនឹងធ្វើការដំឡើងប្រាក់ខែដល់មន្ត្រីរាជការស្រាប់តែតម្លៃទំនិញមានការកើនឡើងមុនការដំឡើងប្រាក់ខែទៅទៀត"។ លោកស្រីបានបន្ថែមថា៖ "ដូច្នេះការសម្រេចបន្ថែមប្រាក់បំណាច់ទៅលើប្រាក់ខែនេះ វានៅតែមិនគ្រប់គ្រាន់ដដែល។ មន្ត្រីរាជការសុខចិត្តមិនទទួលយកការបន្ថែមប្រាក់បំណាច់ទៅលើប្រាក់ខែ ប៉ុន្តែអ្វីដែលយើងចង់បាននោះ គឺយើងចង់ឲ្យរដ្ឋាភិបាលរកវិធានការយ៉ាងណាដោះស្រាយបញ្ហាទំនិញឡើងថ្លៃជាការសំខាន់ជាង"។
ចំពោះការដំឡើងប្រាក់បំណាច់ពីរម៉ឺនរៀលនេះ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានមានប្រសាសន៍ឲ្យដឹងថា៖ "យើងសូមធ្វើការស្វាគមន៍ចំពោះរដ្ឋាភិបាលក្នុងការគិតគូរសម្រេចបន្ថែមប្រាក់បំណាច់ពីរម៉ឺនរៀលទៅដល់មន្ត្រីរាជការ ប៉ុន្តែការបន្ថែមនេះ វាគាប់ជួនទៅនឹងពេលវេលានៃការបោះឆ្នោតឈានមកដល់។ ដូច្នេះយើងអាចគិតថា វាគឺជាការកេងចំណេញរបស់រដ្ឋាភិបាលខាងផ្នែកនយោបាយ ដោយការបន្ថែមនេះ វាមិនអាចប៉ះប៉ូវទប់ទល់ទៅនឹងតម្លៃទីផ្សារបានទេ"។ លោក រ៉ុង ឈុន បានគូសបញ្ជាក់ថា៖ "រដ្ឋាភិបាលគួរតែមានការបន្ថែមប្រាក់បំណាច់ ឬដំឡើងប្រាក់ខែដល់ទៅ២០០% ទើបអាចធ្វើឲ្យមានតុល្យភាពទៅនឹងអតិផរណានៅលើទីផ្សារបាន ព្រោះក្នុងពេលនេះរដ្ឋាភិបាលបន្ថែមតែពីរម៉ឺនរៀលនេះគ្រាន់តែជាការស្វែងរកការគាំទ្រពីសំណាក់គ្រូបង្រៀន និងមន្ត្រីរាជការផ្សេងៗទៀតតែប៉ុណ្ណោះ"។
ចំពោះការសម្រេចបន្ថែមប្រាក់បំណាច់ពីរម៉ឺនរៀលដល់មន្ត្រីរាជការនៅទូទាំងប្រទេសនេះ រដ្ឋាភិបាលពន្យល់ថា ការសម្រេចបន្ថែមប្រាក់បំណាច់នេះ គឺដោយសារតែកាលពីលើកមុន រដ្ឋាភិបាលបានធ្វើការដោះស្រាយសម្រេចបន្ថែមប្រាក់បំណាច់ទៅដល់កម្មករកម្មការិនីម្ដងរួចមកហើយក្នុងការទាមទារសុំដំឡើងប្រាក់ខែ។ ដូច្នេះហើយ នៅពេលនេះរដ្ឋាភិបាលបានធ្វើការសម្រេចចិត្តផ្ដល់ថវិកាពីរម៉ឺនរៀលទៀតជូនបុគ្គលិកមន្ត្រីរាជការវិញម្ដងតាមលទ្ធភាពរបស់រដ្ឋាភិបាលដែលមាន។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ដែលជាអ្នកនាំពាក្យរដ្ឋាភិបាលកម្ពុជាបានមានប្រសាសន៍ឲ្យដឹងថា៖ "កន្លងមកយើងបានធ្វើការបន្ថែមដល់កម្មករ-កម្មការិនីចំនួន៦ដុល្លារអាមេរិករួចហើយ ចុះមន្ត្រីរាជការហេតុអ្វីបានជាយើងមិនធ្វើការដំឡើងឲ្យគេផង?"។ លោកបានបន្តថា៖ "រដ្ឋាភិបាលបានធ្វើការសម្រេចឲ្យបន្ថែមជូនមន្ត្រីរាជការបានចំនួនតែប៉ុណ្ណឹងទេ ដោយការជូននេះយើងគិតត្រឹមពីខែកក្កដា-ខែធ្នូ ឆ្នាំ២០០៨នេះ។ ប៉ុន្តែនៅពេលចូលដល់ឆ្នាំក្រោយទៀត រដ្ឋាភិបាលនឹងគិតបញ្ចូលទៅក្នុងប្រាក់បៀវត្សរ៍ហើយ"។
លោក ខៀវ កាញារីទ្ធ បានគូសបញ្ជាក់ថា៖ "ជាក់ស្ដែងដើម្បីគិតគូរទៅលើការបញ្ចុះតម្លៃទំនិញនៅលើទីផ្សារបានមានតែវិធីមួយគត់គឺឲ្យកសិករដែលលក់ស្រូវ ឲ្យគាត់ធ្វើការបញ្ចុះតម្លៃលក់ ដោយក្នុង ១គីឡូ មានតម្លៃ១០០-២០០ រៀលប៉ុណ្ណោះ ប៉ុន្តែក្នុងនោះតើយើងអាចធ្វើដូច្នេះបានទេ?"។ មន្ត្រីអ្នកនាំពាក្យរដ្ឋាភិបាលរូបនេះបានពន្យល់ថា៖ "ប្រសិនបើទំនិញមានច្រើនទើបវាអាចចុះថោកបាន ចុះមកដល់ពេលឥឡូវនេះទំនិញកំពុងតែឡើងថ្លៃហើយ កម្ពុជាយើងមានដល់ទៅ ៨០% ជាកសិករ តើយើងអាចធ្វើការបង្ខំឲ្យកសិករយើងលក់ក្នុងតម្លៃ ១០០-២០០បានទេ? ហើយចំពោះរដ្ឋាភិបាលបន្ថែមលុយពីរម៉ឺនរៀលនេះ គឺសម្រាប់អ្នកដែលអត់ធ្វើស្រែនេះ ដើម្បីឲ្យគាត់មានលុយបានទៅទិញថែមទៀត"៕