ស្របពេលដែលតម្លៃប្រេងនៅលើពិភពលោកចេះតែកើនឡើងតម្លៃខ្ពស់ ក្រុមហ៊ុនផលិតជីវឧស្ម័នដែលចម្រាញ់ចេញពីដំឡូងមីរបស់កូរ៉េខាងត្បូង នឹងត្រូវដំណើរការនៅកម្ពុជាជាលើកដំបូងក្នុងខែ តុលា ខាងមុខ ដើម្បីចូលរួមចំណែកបំពេញតម្រូវការនៃការប្រើប្រាស់របស់ប្រជាជនកម្ពុជាក៏ដូចជាពិភពលោកទាំងមូល។
គម្រោងនៃការផលិតជីវឧស្ម័ននេះ គឺត្រូវបានបង្ហាញឲ្យដឹងបន្ទាប់ពីប្រធានក្រុមហ៊ុន MH. Bio-energy Group របស់ប្រទេសកូរ៉េខាងត្បូង បានជួបលោកនាយករដ្ឋមន្ត្រីនៅទីក្រុងតាខ្មៅ កាលពីថ្ងៃទី ១៥ ខែ កក្កដា កន្លងទៅ។ នេះបើយោងតាមការឲ្យដឹងរបស់លោក អ៊ាង សុផល្លែត ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន។ លោកបានបន្តដោយស្រង់ប្រសាសន៍របស់លោក ឆ័យ វីស៊ុង (Choi Wee Sung) ប្រធានក្រុមហ៊ុនផលិតជីវឧស្ម័នថា ៖ "លោក ឆ័យ វីស៊ុង បានបញ្ជាក់ប្រាប់ប្រមុខរដ្ឋាភិបាលថា ចាប់ពីឆ្នាំ២០០៩ ទៅ រោងចក្រនឹងត្រូវការដំឡូងមីដើម្បីផលិតជីវឧស្ម័នប្រមាណជា ៣០ ម៉ឺនតោន ក្នុងមួយឆ្នាំៗ ហើយនឹងចេះតែកើនជាងនេះនៅឆ្នាំបន្តបន្ទាប់ទៀត"។ លោក អ៊ាង សុផល្លែត បានបញ្ជាក់ថា លោក ឆ័យ វីស៊ុង បានស្នើឲ្យលោកនាយករដ្ឋមន្ត្រី ហ៊ុន សែន ជំរុញឲ្យពលរដ្ឋដាំដំឡូងមីដើម្បីបំពេញតម្រូវការនៃការផលិតរបស់រោងចក្រ។
លោក អ៊ាង សុផល្លែត បានឲ្យដឹងថា ប្រមុខរដ្ឋាភិបាលបានសាទរចំពោះក្រុមហ៊ុន MH. Bio-energy Group និងបានសុំឲ្យនាយកក្រុមហ៊ុនពង្រីកការវិនិយោគរបស់ខ្លួននៅកម្ពុជាឲ្យបានរឹងមាំ ដោយក្នុងនោះប្រមុខរដ្ឋាភិបាលមានប្រសាសន៍ថា រោងចក្រនេះនឹងផ្ដល់ប្រយោជន៍ដល់កម្ពុជាជាច្រើន ក្នុងនោះដូចជាផ្ដល់ជីវឧស្ម័នដែលជាសេចក្ដីត្រូវការរបស់ប្រជាពលរដ្ឋកម្ពុជា និងពិភពលោក ផ្ដល់ទីផ្សារដំឡូងសម្រាប់ប្រជាកសិករខ្មែរ ផ្ដល់ការងារសម្រាប់ប្រជាពលរដ្ឋខ្មែរ និងផ្ដល់បច្ចេកវិទ្យាទំនើបៗដល់កម្ពុជាផងដែរ។
រោងចក្រផលិតជីវឧស្ម័នរបស់ក្រុមហ៊ុន MH. Bio-energy Group ដែលមានទីតាំងស្ថិតក្នុងខ័ណ្ឌឫស្សីកែវ ក្រុងភ្នំពេញនោះ បានពិពណ៌នាលើគេហទំព័ររបស់ខ្លួនតាមប្រព័ន្ធអ៊ិនធ័រណិតថា ខ្លួនជាក្រុមហ៊ុនវិនិយោគកូរ៉េធំជាងគេបង្អស់នៅក្នុងប្រទេសកម្ពុជា ហើយក្រុមហ៊ុននេះគ្រោងចាប់ផ្ដើមផលិតជីវឧស្ម័នអេតាណុលនៅក្នុងឆ្នាំ២០០៨នេះ។ ក្រុមហ៊ុនសរសេរថា ៖ "យើងអាចផ្គត់ផ្គង់គ្រប់ផលិតផលកសិកម្មជាច្រើនប្រភេទនៅក្នុងទីផ្សារពិភពលោក ជាពិសេសចំណិតដំឡូងមី និងម្សៅមី"។
លោក ចាន់ តុងអ៊ីវ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា រោងចក្រផលិតជីវឧស្ម័ននេះនឹងធ្វើឲ្យទីផ្សារដំឡូងមីរបស់កសិករកម្ពុជាកាន់តែទូលាយថែមទៀត។ លោក ចាន់ តុងអ៊ីវ មានប្រសាសន៍ថា កន្លងមកមានតែរោងចក្រម្សៅដំឡូងមីប៉ុណ្ណោះដែលកំពុងដំណើរការនៅក្នុងទឹកដីខេត្តកំពង់ចាម។ បើតាមលោក ចាន់ តុងអ៊ីវ គឺទិន្នផលដំឡូងមីសរុបនៅកម្ពុជាក្នុងមួយឆ្នាំមានប្រមាណជាងមួយពាន់តោន ដែលចំនួននេះនឹងត្រូវបង្កើនថែមទៀតនៅពេលដែលរោងចក្រជីវឧស្ម័នដំណើរការ។
សូមបញ្ជាក់ថា ជីវឧស្ម័នដែលគេនឹងផលិតនេះ គឺគេអាចប្រើជំនួសប្រេងឥន្ធនៈ ធម្មជាតិបាន ហើយបើនៅប្រទេសកូរ៉េវិញគ្រោងប្រើជីវឧស្ម័នជំនួសឲ្យបាន ៥% និង ប្រទេសម៉ាឡេស៊ី ២៤%។ កន្លងមកនៅប្រទេសកម្ពុជា មានតែវិស័យវាយនភណ្ឌទេដែលធ្វើការនាំចេញច្រើនជាងគេ ប៉ុន្តែវត្ថុធាតុដើមដែលផលិតនៅក្នុងវិស័យនេះ គឺត្រូវនាំចូលពីបរទេស។ ចំណែករោងចក្រជីវឧស្ម័នវិញ គឺវត្ថុធាតុដើមជាផលិតផលកសិកម្មក្នុងស្រុកហើយនៅក្នុងការដំណើរការនៃរោងចក្រនេះ គេសង្ឃឹមថា ទាំងអ្នកទីក្រុង និងអ្នកជនបទមានការងារធ្វើច្រើន៕