រដ្ឋមន្ត្រីការបរទេសអូស្ត្រាលីបានប្រកាសថា រដ្ឋាភិបាលរបស់ខ្លួននឹងផ្ដល់មូលនិធិ ជាង៣០លានដុល្លារ ដើម្បីជួយអភិវឌ្ឍន៍ថាមពលអគ្គិសនីនៅក្នុងប្រទេសបីគឺ កម្ពុជា វៀតណាម និងឡាវ។
យោងទៅតាមសេចក្ដីប្រកាសព័ត៌មានរបស់ស្ថានទូតអូស្ត្រាលីកាលពីថ្ងៃទី ១ ខែ កក្កដា កន្លងទៅនេះ បានឲ្យដឹងថា លោក ស្ដេហ្វេន ស្មីត (Stephen Smith) រដ្ឋមន្ត្រីការបរទេសរបស់អូស្ត្រាលីបានឲ្យដឹងអំពីការផ្ដល់មូលនិធិនេះ នៅក្នុងអំឡុងពេលដែលលោកទៅបំពេញទស្សនកិច្ចនៅវៀតណាម។
លោក ស្ដេហ្វេន ស្មីត បានប្រកាសឲ្យដឹងថា ប្រទេសអូស្ត្រាលីនឹងផ្ដល់ជំនួយដល់ប្រទេសនៅអាស៊ី ដើម្បីបំពេញតម្រូវការរបស់ខ្លួនជាបន្ទាន់លើការផ្គត់ផ្គង់ថាមពលអគ្គិសនីសម្រាប់ការប្រើប្រាស់ប្រកបដោយនិរន្តរភាព។
លោក ស្ដេហ្វេន ស្មីត បានមានប្រសាសន៍ថា "អូស្ត្រាលីនឹងផ្ដល់មូលនិធិ ជាង៣០លានដុល្លារ តាមរយៈធនាគារពិភពលោកសម្រាប់រយៈពេល៤ឆ្នាំ ក្នុងការធ្វើឲ្យប្រសើរឡើងលើការផ្គត់ផ្គង់ថាមពលអគ្គិសនីនៅជនបទ កាត់បន្ថយការបាត់បង់ថាមពលក្នុងពេលចែកចាយ និងជំរុញការប្រើប្រាស់ប្រភពអគ្គិសនីថ្មី ក្នុងប្រទេសកម្ពុជា វៀតណាម និងឡាវ"។
លោក ស្ដេហ្វេន ស្មីត បានបន្តឲ្យដឹងទៀតថា "នៅកម្ពុជាមានតែ៦ភាគរយនៃចំនួនគ្រួសារសរុបប៉ុណ្ណោះ ដែលអាចទទួលបាននូវថាមពលអគ្គិសនីសម្រាប់ប្រើប្រាស់។ អូស្ត្រាលីនឹងផ្ដល់មូលនិធិចំនួន ១២លាន៣សែនដុល្លារ ដើម្បីគាំទ្រដល់ការពង្រីកការផ្គត់ផ្គង់ថាមពលអគ្គិសនីដល់សហគមន៍ចំនួន ១៣ពាន់គ្រួសារ និងសហគ្រាសខ្នាតតូចមួយចំនួននៅទីជនបទបន្ថែមទៀត"។
លោក ស្ដេហ្វេន ស្មីត បានថ្លែងបន្តថា "មូលនិធិនឹងត្រូវផ្ដល់ផងដែរ តាមរយៈកម្ចីដោយមានការធានាសម្រាប់ទ្រទ្រង់ដល់ការវិនិយោគថ្មីលើប្រភពថាមពលថ្មី និងការផ្ដល់ការប្រើប្រាស់លើចង្ក្រានចម្អិនដោយប្រើជីវសារធាតុ ដើម្បីកាត់បន្ថយផលប៉ះពាល់ដោយឧស្ម័នផ្ទះកញ្ចក់ និងការបំពុលបរិយាកាស"។
គំនិតផ្ដួចផ្ដើមថ្មីនេះ ត្រូវបានធ្វើឡើងដោយឈរលើមូលដ្ឋាននៃកម្មវិធីសហប្រតិបត្តិការដ៏រឹងមាំដែលធ្លាប់មានកន្លងមកនៅកម្ពុជា។ រដ្ឋាភិបាលអូស្ត្រាលីនឹងផ្ដល់មូលនិធិប្រមាណ ៦១លាន២សែនដុល្លារអូស្ត្រាលី (៥៨លាន៦សែនដុល្លារអាមេរិក) សម្រាប់ជំនួយអភិវឌ្ឍន៍នៅកម្ពុជា នៅក្នុងឆ្នាំ ២០០៨-០៩ (ពីខែ កក្កដា ដល់ ខែ មិថុនា ២០០៩)។ វិស័យអាទិភាពនៃកិច្ចសហប្រតិបត្តិការរួមមានវិស័យកសិកម្ម ការអភិវឌ្ឍន៍ជនបទ សុខាភិបាល និងកំណែទម្រង់ច្បាប់ និងប្រព័ន្ធយុត្តិធម៌។
សព្វថ្ងៃនេះ កម្ពុជាមានភ្លើងប្រើប្រាស់សរុបត្រឹមតែប្រមាណជា ២៣០មេហ្គាវ៉ាត់ ប៉ុណ្ណោះ សម្រាប់ផ្គត់ផ្គង់ការប្រើប្រាស់នៅតែក្នុងទីក្រុង និងទីប្រជុំជនហើយដើម្បីឲ្យពលរដ្ឋមានភ្លើងប្រើប្រាស់គ្រប់ៗគ្នានោះ កម្ពុជាត្រូវការភ្លើងរហូតដល់ទៅប្រមាណជាជាង ១.០០០មេហ្គាវ៉ាត់ឯណោះ។
បើតាមការគ្រោងទុក រដ្ឋាភិបាលកម្ពុជាមានគម្រោងចែកចាយភ្លើងឲ្យបានទូទាំងប្រទេសនៅក្នុងឆ្នាំ ២០១០ ខាងមុខនេះ ហើយប្រភពភ្លើងដ៏សំខាន់គឺបានមកពីការវិនិយោគគម្រោងវារីអគ្គិសនី និងការនាំចូលភ្លើងពីប្រទេសឯទៀត៕