លោកបណ្ឌិត អូន ព័ន្ធមុនីរ័ត្ន ជួបពិភាក្សាជាមួយលោក តូជីម៉ា ហ្វីកូស៊ី ប្រធានធនាគារជប៉ុន JBIC (រូបថត៖ គន្ធា)ភ្នំពេញ៖ យោងតាមក្រសួងសេដ្ឋកិច្ច និងហិរញ្ញវត្ថុបានឲ្យដឹងថា ការិយាល័យតំណាងរបស់ធនាគារជប៉ុនសម្រាប់កិច្ចសហប្រតិបត្តិការអន្តរជាតិ (JBIC) ដែលជាកន្លែងពិនិត្យផ្ដល់ឥណទានសម្រាប់គម្រោងការអភិវឌ្ឍន៍របស់កម្ពុជានឹងរើពីក្រុងបាងកក(ថៃ)មកនៅក្រុងភ្នំពេញ ចាប់ពីខែតុលាឆ្នាំ២០០៨នេះ។
មន្ត្រីនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់អ្នកយកព័ត៌មានថា: លោកតូជីម៉ា ហ៊ីកូស៊ី ប្រធានធនាគារជប៉ុន (JBIC)បានជម្រាបប្រាប់លោក អូន ព័ន្ធមុនីរ័ត្ន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុក្នុងជំនួបផ្លូវការកាលពីថ្ងៃអង្គារនេះថា: ទីស្នាក់ការធនាគារជប៉ុន JBIC សម្រាប់កិច្ចការប្រទេសកម្ពុជាដែលពីមុនមានស្នាក់ការនៅក្រុងបាងកក នឹងត្រូវរើមកនៅជាមួយទីភ្នាក់ងារជប៉ុនសម្រាប់កិច្ចសហប្រតិបត្តិការជប៉ុន JICA នៅប្រទេសកម្ពុជា នៅពេលឆាប់ៗខាងមុខនេះក្រោយពីធនាគារ JBIC និងអង្គការ JICA បានច្របាច់បញ្ចូលគ្នាតាមនយោបាយថ្មីរបស់រដ្ឋាភិបាលជប៉ុន។
