និស្សិតបញ្ញវន្តនៅសាកលវិទ្យាល័យនានាក្នុងប្រទេសកម្ពុជា បាននឹងកំពុងបង្ហាញពីតម្រូវការរបស់ខ្លួនទៅកាន់រដ្ឋាភិបាលអាណត្តិថ្មី ដែលនឹងប្រសូត្រឡើងនៅក្រោយការបោះឆ្នោតជ្រើសតាំងតំណាងរាស្ត្រអាណត្តិទី៤ ខាងមុខនេះ ហើយក៏មានគណបក្សនយោបាយជាច្រើនកំពុងខិតខំបង្ហាញពីគោលនយោបាយ និងកិច្ចសន្យារបស់គណបក្សខ្លួនទាក់ទងនឹងយុវជននៅក្នុងពេលឃោសនាយុទ្ធនាការបោះឆ្នោតដែលកំពុងតែដំណើរការនេះដែរ។ ការបង្ហាញអំពីតម្រូវការរបស់និស្សិតនៅកម្ពុជានេះ ត្រូវបានធ្វើឡើងក្នុងទិសដៅទាមទារឲ្យមានទំនុកចិត្តពីរដ្ឋាភិបាលអាណត្តិទី៤ និងនាយករដ្ឋមន្ត្រីសម្រាប់រដ្ឋាភិបាលថ្មីរបស់ប្រទេសកម្ពុជាថា តើរដ្ឋាភិបាលថ្មីនេះ គួរមានកាតព្វកិច្ចធ្វើយ៉ាងណាខ្លះដើម្បីដោះស្រាយរាល់បញ្ហាទាំងឡាយណាដែលម្ចាស់ឆ្នោតចង់បាន។
កញ្ញា អេង ឈាងឡេង និស្សិតឆ្នាំទី២ ផ្នែកគណនេយ្យនៅសាកលវិទ្យាល័យធនធានមនុស្សបានមានប្រសាសន៍កាលពីថ្ងៃទី ២៧ មិថុនាឲ្យដឹងថា៖ "ជាមួយនិងការឃោសនាគោលនយោបាយរបស់គណបក្សនីមូយៗនាពេលបច្ចុប្បន្ននេះ ខ្ញុំចង់ឲ្យរដ្ឋាភិបាលអាណត្តិទី៤ នៅកម្ពុជា បានបំពេញនូវអ្វីដែលខ្លួនតែងតែសន្យាជាមួយប្រជាពលរដ្ឋក្នុងការស្វែងរកសំឡេងឆ្នោតផងដែរ"។
ប្រទេសកម្ពុជា សម្រេចបានកំណើនសេដ្ឋកិច្ចពីរខ្ទង់ក្នុងរយៈពេលបួនឆ្នាំជាប់គ្នាចុងក្រោយនេះ។ ទោះជាយ៉ាងនេះក្ដី ស្ថានភាពសេដ្ឋកិច្ចនាបណ្ដាឆ្នាំខាងមុខហាក់មានភាពពុំប្រសើរឡើយ ដោយសារ អតិផរណាខ្ពស់, ការធ្លាក់ចុះលំនាំចេញផលិតផលកាត់ដេរ និងការឈប់មានកំណើនក្នុងវិស័យអចលនវត្ថុតទៅទៀត។
