ថ្ងៃនេះ ទី៣០ មេសាគឺជាថ្ងៃប្រវត្តិសាស្ត្រមួយ ដែលប្រទេសកម្ពុជាចូលជាសមាជិកអាស៊ាន។ ពិធីបញ្ចូលជាសមាជិក ជាផ្លូវការ ត្រូវបានប្រារព្ធធ្វើឡើងនៅរដ្ឋធានីហាណូយ ប្រទេសវៀតណាម កាលពីថ្ងៃ ៣០ មេសាឆ្នាំ១៩៩៩។ ជាសមាជិកសហគមន៍អន្តរជាតិ កម្ពុជាក៏បានធ្វើសមាហរណកម្មក្នុងសកលភាវូបនីយកម្ម លើគ្រប់វិស័យ។
ថ្ងៃស្អែកនេះ គឺជាទិវាពលកម្មអន្តរជាតិ ១ ឧសភា។ ជាធម្មតា ស្ថាប័នរដ្ឋ និងអង្គការមិនមែនរដ្ឋាភិបាលមួយចំនួនតែងមានរៀបចំពិធីទទួលអបអរសាទរគាំទ្រគោលគំនិតនៃទិវានេះ។ គេប្រារព្ធទិវាពលកម្មអន្តរជាតិដើម្បីអបអរសាទរសមិទ្ធផលសេដ្ឋកិច្ច សង្គម ដែលចលនាពលកម្មអន្តរជាតិដណ្ដើមបាន។ ទិវានេះរំលឹកឡើងវិញនូវការតស៊ូរបស់បុគ្គលិក កម្មកររាប់លាននាក់នៅទ្វីបអឺរ៉ុបនិងប្រទេសដទៃឯទៀត លើកលែងតែប្រទេសអាមេរិក និងកាណាដា ទោះបីជាការឈប់សម្រាកបានចាប់ផ្ដើមនៅប្រទេសអាមេរិកក្នុងអំឡុងទសវត្ស ទី ៨០ ក៏ដោយ ដើម្បីទាមទារបន្ថយម៉ោងធ្វើការ នៅត្រឹម៨ម៉ោងក្នុងមួយថ្ងៃ។
