គណៈប្រតិភូសភាសហភាពអឺរ៉ុប និងលោកស្រី ម៉ម សុមាលី ពិភាក្សាលើបញ្ហាប្រឆាំងទេសចរណ៍ផ្លូវភេទភ្នំពេញ៖ ដើម្បីបង្កើនការស្វែងយល់ពីបញ្ហារួមក្នុងទិសដៅរួមចំណែកប្រយុទ្ធប្រឆាំងទេសចរណ៍ផ្លូវភេទ នៅក្នុងប្រទេសកម្ពុជាឲ្យមានប្រសិទ្ធភាពខ្ពស់នោះគណៈប្រតិភូសភាសហភាពអឺរ៉ុបដែលដឹកនាំដោយលោក Jules Maaten និងលោកស្រី Swale Ludford បានធ្វើដំណើរមកដល់ប្រទេសកម្ពុជាហើយ។
កាលពីរសៀលថ្ងៃទី២៣ ខែកក្កដា ឆ្នាំ២០០៨ កន្លងមកនេះ គណៈប្រតិភូសភាសហភាពអឺរ៉ុបបានធ្វើការពិភាក្សាស្វែងយល់ពីបញ្ហាមួយចំនួនជុំវិញការប្រយុទ្ធប្រឆាំងទេសចរណ៍ផ្លូវភេទ នៅកម្ពុជាជាមួយមន្ត្រីជាន់ខ្ពស់នៃអង្គការ AFESIP ប្រចាំក្រុងភ្នំពេញដោយមានការចូលរួមពីបណ្ដាអ្នកសារព័ត៌មានជាតិ និងអន្តរជាតិមួយចំនួនផងដែរ។
លោកស្រី ម៉ម សុមាលី (Somaly Mam) អគ្គនាយិកាអង្គការ AFESIP និង Somaly Mam Foundation បានមានប្រសាសន៍ថា រដ្ឋាភិបាលលោកខាងលិចគួរតែបើកភ្នែកមើលសកម្មភាពរបស់ពលរដ្ឋខ្លួនដែលបានប្រព្រឹត្តបទឧក្រិដ្ឋនៅឯក្រៅប្រទេសផង។ ជារឿយៗពួកគេបន្លំខ្លួនជាអ្នកទេសចរ ឬពេលខ្លះជាបុគ្គលិកអង្គការសប្បុរសធម៌មកប្រទេសកម្ពុជាដើម្បីធ្វើការស្វែងរកឱកាសរំលោភបំពានផ្លូវភេទលើកុមារ។ កុមារកាន់តែច្រើនឡើងៗបាននិងកំពុងរងគ្រោះដោយការរំលោភផ្លូវភេទដោយសារបទល្មើសច្បាប់របស់ពួកគេមិនងាយត្រូវបានបង្ក្រាបដោយអាជ្ញាធរ។
លោកស្រី ម៉ម សុម៉ាលី បានគូសបញ្ជាក់ថា "នៅកម្ពុជារដ្ឋាភិបាលបានធ្វើឲ្យមានការរីកចម្រើនគួរឲ្យកត់សំគាល់ក្នុងការប្រយុទ្ធប្រឆាំងនឹងការជួញដូរដូចជាបានបង្កើតច្បាប់ប្រឆាំងនឹងការជួញដូរនិងក្រុមការងារថ្នាក់ជាតិប្រយុទ្ធប្រឆាំងនឹងការជួញដូរ"។ ទោះជាយ៉ាងណាក៏ដោយ ក៏រាជរដ្ឋាភិបាលត្រូវធ្វើការងារជាច្រើនទៀត ជាពិសេសពង្រឹងយន្តការប្រឆាំងការជួញដូរ និងច្បាប់ដែលមានស្រាប់។
គួររំលឹកបន្ថែមថា លោកស្រី ម៉ម សុម៉ាលី បានសង្គ្រោះកុមារដែលជាទាសករផ្លូវភេទជាង៤០០០នាក់ក្នុងរយៈពេលមួយទសវត្សកន្លងមក។ ក្នុងនោះលោកស្រីបានបង្កើតអង្គការសកម្មភាពសង្គ្រោះស្ត្រីរងគ្រោះ Acting For Women in Distressing Situalion (AFESIP) ផ្ដល់ពិគ្រោះយោបល់ និងស្ដារនីតិសម្បទាដល់ជនរងគ្រោះនៅក្នុងមណ្ឌលដែលមានទីតាំងក្នុងប្រទេសកម្ពុជា ថៃ ឡាវ និងវៀតណាម។ ហើយថ្មីៗនេះលោកស្រីទទួលបានការគាំទ្រជាច្រើនពីមិត្តភក្ដិដែលជាតារាល្បីៗ ពាណិជ្ជករ មេធាវី និងសប្បុរសជនបានបង្កើតមូលនិធិសុម៉ាលីម៉មមានគោលដៅលុបបំបាត់ឫសគល់នៃការជួញដូរមនុស្សតាមរយៈធ្វើយុទ្ធនាការផ្សព្វផ្សាយទូលំទូលាយ និងតស៊ូមតិលើបញ្ហាទាក់ទង និងការជួញដូរនិងកេងប្រវ័ញ្ចផ្លូវភេទលើកុមារក្នុងប្រទេសតំបន់នឹងអន្តរជាតិ។
លោក Jules Maaten ប្រធានគណៈប្រតិភូសភាសហភាពអឺរ៉ុបដែលបច្ចុប្បន្នជាសមាជិកសភារបស់ប្រទេសហុល្លង់បានមានប្រសាសន៍ឲ្យដឹងថា ប្រទេសកម្ពុជាបានក្លាយជាទីតាំងសំខាន់សម្រាប់ជនល្មើសរំលោភផ្លូវភេទលើកុមារហើយរៀងរាល់ឆ្នាំក្មេងៗជាច្រើនត្រូវបានគេយកទៅប្រើប្រាស់ជាទាសករផ្លូវភេទរបស់ពួកទេសចរលោកខាងលិច និងបុគ្គលិកអង្គការសប្បុរសធម៌មួយចំនួន។ ឥឡូវនេះយើងត្រូវតែបើកភ្នែកមើលស្ថានភាពនេះ និងចាត់វិធានការប្រឆាំងនឹងទំរង់នៃទាសភាពយុគសម័យនេះ។
លោកស្រី Swale Ludford សមាជិកសភាមកពីចក្រអង់គ្លេសបានលើកឡើងពីរបៀបដែលជនល្មើសគេចពីការចាប់ខ្លួន និងកាត់ទោសដោយសារប៉ូលិសមិនមានសមត្ថភាពពេញលេញគ្រប់គ្រាន់ក្នុងការកាត់ទោសពួកជនទាំងនោះ។ ជនសង្ស័យដែលបានចាប់ខ្លួនតែងតែសូកប៉ាន់ដើម្បីឲ្យពួកគេមានផ្លូវគេចខ្លួន និងរត់ភៀសខ្លួនទៅប្រទេសគេវិញ។ មានតែមួយករណីប៉ុណ្ណោះក្នុងចំណោម៥ករណីដែលជនសង្ស័យទាំងនោះត្រូវបានយកទៅកាត់ទោស ហើយជនសង្ស័យតែ៣ភាគរយប៉ុណ្ណោះដែលត្រូវបានកាត់ឲ្យជាប់ទោសពីបទរំលោភផ្លូវភេទលើកុមារ។
បន្ទាប់ពីបានធ្វើការពិភាក្សាគ្នារួចមកលោកស្រី ម៉ម សុម៉ាលី និងគណៈប្រតិភូសភាសហភាពអឺរ៉ុបបានឯកភាពគ្នាលើសំណើចំនួន៣ គឺទី១ សមាជិករដ្ឋសភាភាពអឺរ៉ុបគួរតែផ្ដល់តួនាទីកាន់តែធំជាងមុនដល់ប៉ូលិសសហភាពអឺរ៉ុបដើម្បីទទួលបានអំណាច និងមធ្យោបាយយកមកបណ្ដុះបណ្ដាលដល់មន្ត្រីប៉ូលិសព្រះរាជអាជ្ញា និងចៅក្រមស្ដីពីការជួញដូរនិងកេងប្រវ័ញ្ចផ្លូវភេទលើកុមារ។ ទី២- សហភាពអឺរ៉ុបគួរតែបង្កើនការយកចិត្តទុកដាក់និងធ្វើការផ្លាស់ប្ដូរព័ត៌មានជាមួយប្រទេសទី៣ និងរក្សាការពារទិន្នន័យដើម្បីជួយធ្វើការកំណត់អត្តសញ្ញាណជនសង្ស័យទាំងនោះ ដើម្បីឈានទៅដល់ការកាត់ក្ដីជនល្មើសទាំងនោះ។ ទី៣- សហភាពអឺរ៉ុបគួរតែដាក់បញ្ចូលព័ត៌មានស្ដីពីការកាត់ក្ដីជនទេសចរផ្លូវភេទទាំងនោះរួមទាំងជនល្មើសដែលមិនដែលជាប្រជាជនមកពីសហភាពអឺរ៉ុបដោយធ្វើការដាក់បញ្ចូលទៅក្នុងប្រព័ន្ធព័ត៌មាន Schengen៕