កម្មវិធីស្ត្រី ជាកម្មវិធីមួយក្នុងចំណោមកម្មវិធីចម្បងចំនួន៦ របស់អង្គការវិទ្យាស្ថានបើកទូលាយ។ កម្មវិធីស្ត្រី ត្រូវបានផ្ដួចផ្ដើមឡើងនាចុងឆ្នាំ២០០៦ និងមានសកម្មភាពធំៗ ចំនួនបីគឺ វិបផតថលស្ដីអំពីស្ត្រី វគ្គបណ្ដុះបណ្ដាលកសាងសមត្ថភាពបច្ចេកវិទ្យាព័ត៌មាន និងការសិក្សាស្រាវជ្រាវអំពីយេនឌ័រនិងការប្រើប្រាស់បច្ចេកវិទ្យាព័ត៌មាន។
វិបផតថលស្ដីអំពីស្ត្រី (http://women.open.org.kh) គឺជាសមិទ្ធផលចម្បងមួយ ដែលផ្ដល់ជូនអង្គការស្ត្រី និងស្ថាប័ននានា នូវបណ្ដុំព័ត៌មានដ៏សំបូរបែប ដែលបច្ចុប្បន្នមានចំនួនជាង៥០០ខ្លឹមសារ ដែលទាក់ទងនឹងច្បាប់ បច្ចេកវិទ្យាព័ត៌មាន ការអភិវឌ្ឍន៍ សមភាពយេនឌ័រ និងផ្នែកផ្សេងៗទៀតជាច្រើន។
ក្នុងគោលបំណងធ្វើការឆ្លុះបញ្ចាំង អំពីខ្លឹមសារនៃវិបផតថល ជាមួយនិងបញ្ហានានារបស់ស្ត្រីដែលកើតមានក្នុងសង្គម និងដើម្បីធ្វើឲ្យវិបផតថលស្ត្រី ឆ្លើយតបទៅនឹងតម្រូវការក្រុមគោលដៅ ជាកញ្ចក់នៃតថភាពសង្គម មានលក្ខណៈវិជ្ជាជីវៈខ្ពស់ មានព័ត៌មានថ្មី ទាន់ពេលវេលា សំបូរបែប ទាក់ទាញ និងឆ្លើយតបទៅនឹងតម្រូវការ របស់អ្នកអាន នោះអង្គការវិទ្យាស្ថានបើកទូលាយ សូមអញ្ជើញលោកស្រី អស់លោកដែលមានការចាប់អារម្មណ៍និងការងារនេះ សូមចូលរួមជាសមាជិកនៃក្រុមទីប្រឹក្សាសរសេរបទវិចារណកថា នៃវិបផតថលអំពីស្ត្រី។
១ ការប្រជុំក្រុមទីប្រឹក្សាសរសេរបទវិចារណកថា
ក្រុមទីប្រឹក្សាសរសេរបទវិចារណកថា នឹងជួបប្រជុំគ្នារៀងរាល់២ខែម្ដង ដើម្បីធ្វើការពិនិត្យនិងផ្ដល់ការណែនាំ តម្រង់ទិស ដល់ការសរសេរបទវិចារណកថា ចូលរួមផ្ដល់គំនិតយោបល់ ក៏ដូចជាអនុសាសន៍នានាសម្រាប់អភិវឌ្ឍវិបផតថលស្ត្រី និងពិនិត្យឡើងវិញអំពីជ្រុងជ្រោយនានានៃបញ្ហាស្ត្រី ។
២ តើអ្នកណាខ្លះអាចចូលរួមក្នុងក្រុមនេះបាន?
ក្រុមទីប្រឹក្សាសរសេរបទវិចារណកថា គឺជាក្រុមការងារស្ម័គ្រចិត្តមួយ ដែលមានសមាជិកជាស្ត្រី និងបុរសដែលជាតំណាងអង្គការ ស្ថាប័ន ឬជាបុគ្គល ដែលធ្វើការងារទាក់ទងទៅនឹង ជំនាញខាងផលិត និងផ្សព្វផ្សាយព័ត៌មាន ការនិពន្ធ និងការសរសេរបទវិចារណកថា យេនឌ័រ ច្បាប់ សិទ្ធិមនុស្ស ឬការស្រាវជ្រាវផ្សេងៗដែលពាក់ព័ន្ធជាមួយ សមភាពយេនឌ័រ និងការអភិវឌ្ឍន៍សង្គម។
៣ លក្ខណៈវិនិច្ឆ័យ
សមាជិកក្រុមទីប្រឹក្សាសរសេរបទវិចារណកថា ត្រូវមានលក្ខណៈសម្បត្តិ ជាចម្បងមួយចំនួនដូចជា មានបទពិសោធន៍ក្នុងការសរសេរ មានចំណេះដឹងអំពីការងារនិងបញ្ហានានារបស់ស្ត្រី មានសមត្ថភាពក្នុងការវិនិច្ឆ័យ និងធ្វើការវិភាគ ចេះប្រើប្រាស់កុំព្យូទ័រ និងស្វែងរកព័ត៌មានលើអ៊ីនធឺណិត និងអាចប្រើប្រាស់ភាសាខ្មែរ និងអង់គ្លេសបានល្អ សម្រាប់ការអាន សរសេរ និងនិយាយ ។
សូមចូលរួមចំណែកជាមួយយើងខ្ញុំ ក្នុងការជំរុញសមភាពយេនឌ័រ និងការចូលរួមរបស់ស្ត្រីក្នុងការអភិវឌ្ឍន៍សង្គម សម្រាប់ព័ត៌មានលំអិត សូមចូលអាន http://women.open.org.kh/km/criteria_editorialgroup ឬទំនាក់ទំនងមកកាន់ក្រុមកម្មវិធីស្ត្រី តាមរយៈលេខទូរស័ព្ទ ០២៣ ២២៤៨២១ ឬតាមរយៈ women@open.org.kh អោយបានមុនថ្ងៃទី ២៩ ខែ កុម្ភៈ ឆ្នាំ ២០០៨ វេលាម៉ោង ៥:00 រសៀល ។