ព្រះសីហនុ៖ សមត្ថកិច្ចប៉េអឹមបានចាប់ខ្លួនបុរសដែលមានមុខរបររត់តាក់ស៊ីម្នាក់ កាលពីថ្ងៃទី២២ ខែកុម្ភៈ ដោយជាប់សង្ស័យថា បានរំលោភលើកូនស្រីបង្កើតរបស់ខ្លួនរហូតបានសម្រេច។
ប៉ូលិសបានឲ្យដឹងថា បុរសអ្នករត់តាក់ស៊ីនោះ មានការឈ្លោះប្រកែកគ្នាជាមួយប្រពន្ធ ហើយក៏នាំយកកូនស្រីប្រុសចំនួន២នាក់ ដែលជាកូនបង្កើតរបស់ខ្លួនចេញពីផ្ទះនៅព្រលប់ថ្ងៃទី២១កុម្ភៈ។ ដំបូងបុរសរូបនោះបាននាំកូនទៅហូបស៊ុបនៅហាងណាក់ណាក់បន្ទាប់មករូបគេក៏នាំកូនទាំងពីរចូលដេកផ្ទះសំណាក់១៧១ ក្នុងបន្ទប់នោះមានគ្រែចំនួនពីរ កូនប្រុសអាយុ១០ឆ្នាំដេកគ្រែមួយម្នាក់ឯង រីឯកូនស្រីអាយុ១៤ឆ្នាំដេកគ្រែជាមួយឪពុក។ លុះដល់រំលងអធ្រាត្រ វេលាម៉ោងប្រហែល១ឆ្លងចូលថ្ងៃទី២២កុម្ភៈ ឪពុកក៏បានចាប់រំលោភកូនស្រីបង្កើតរបស់ខ្លួនរហូតបានសម្រេចលុះដល់ព្រឹកឡើងរូបគេក៏ដឹកកូនទាំងពីរទៅផ្ទះវិញ ហើយបើកឡានគេចខ្លួនទៅដល់ទំនប់រលក ស្រាប់តែប៉េអឹមឃាត់ខ្លួនបានតែម្ដង។
លោក ហេង ប៊ុនទី បញ្ជាការរងប៉េអឹមខេត្តព្រះសីហនុ ទទួលបន្ទុកផ្នែកសន្តិសុខព្រហ្មទណ្ឌបានឲ្យដឹងថា ជនសង្ស័យបានសារភាពថា រូបគេមានឈ្មោះ ឆាយ គឹមអូន ភេទប្រុសអាយុ៣៤ឆ្នាំ មានទីលំនៅម្ដុំសាលាឆទាន ក្នុងក្រុម១៥ ភូមិ២ សង្កាត់២ ក្រុងព្រះសីហនុ ខេត្តព្រះសីហនុ មានមុខរបររត់តាក់ស៊ី។ ជនសង្ស័យបានសារភាពបន្តថា រូបគេឈ្លោះប្រកែកគ្នាជាមួយប្រពន្ធ ក៏នាំកូនចេញពីផ្ទះទៅហូបស៊ុប ដេកផ្ទះសំណាក់ និងទិញស្រា (ស្បាយ) ចំនួន៥ដបមកផឹកម្នាក់ឯងស្រវឹង ហើយបានរំលោភកូនខ្លួនឯងដោយមិនដឹងខ្លួនតែម្ដង។
បច្ចុប្បន្នជនសង្ស័យត្រូវបានប៉េអឹមបង្កសំណុំរឿងបញ្ជូនទៅសាលាដំបូងដើម្បីផ្ដន្ទាទោសតាមច្បាប់៕
