រាជធានីភ្នំពេញ៖ បញ្ហាអាជីវកម្មបច្ចុប្បន្ន ជាព្រឹត្តិបត្រប្រចាំត្រីមាសមួយស្ដីអំពីវេទិការាជរដ្ឋាភិបាល និងផ្នែកឯកជន។ ផ្នែកមួយដែលត្រូវបានពិភាក្សាពីការងារទេសចរណ៍ដែលមន្ត្រីតំណាងរដ្ឋាភិបាល គឺលោករដ្ឋមន្ត្រី ថោង ខុន និងផ្នែកឯកជនតំណាងដោយលោក ហូ វណ្ណី។ ទាក់ទិននឹងការងារទេសចរណ៍ វេទិកានេះបានពិភាក្សាលើបញ្ហាផ្សេងៗជាច្រើនដោយរាប់បញ្ចូលទាំងច្បាប់ទេសចរណ៍ ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍ តម្លាភាពនៃគម្រោងវិនិយោគទេសចរណ៍នៅតំបន់ចុងឃ្នៀសទន្លេសាប ការផ្សាយពាណិជ្ជកម្មអំពីរង្គសាល និងខារ៉ាអូខេនៅក្នុងសៀវភៅមគ្គុទ្ទេសក៍ទេសចរណ៍ក្នុងស្រុក ការកសាងកេរ្តិ៍ឈ្មោះទេសចរណ៍របស់កម្ពុជា ការអនុវត្តន៍មិនល្អនៅចំណុចត្រួតពិនិត្យអន្តោប្រវេសន៍ប៉ោយប៉ែត ការធ្វើឯកជននីយកម្មឆ្នេរសមុទ្រ ថ្លៃចំណាយទឹក និងភ្លើង សមាគមក្រុមហ៊ុនអាកាសចរណ៍ ការលើកលែងថ្លៃទិដ្ឋាការសំរាប់ទីផ្សារជប៉ុន ព្រមទាំងបញ្ហាផ្សេងៗមួយចំនួនទៀត។
បច្ចុប្បន្នសក្ដានុពលនៃវិស័យទេសចរណ៍គឺប្រាសាទបុរាណដែលពេលនេះកម្ពុជាបានក្លាយជាផ្នែកមួយនៃបណ្ដាញបេតិកភណ្ឌ។ ភាពខ្លាំងលើផ្នែកសក្ដានុពលនេះត្រូវបានកត់សំគាល់ថា កម្ពុជាមានភ័ព្វសំណាងមានប្រាសាទបុរាណជាង៣.០០០។ វិធីប្រសើរបំផុតមួយដើម្បីធ្វើឲ្យទេសចរណ៍កម្ពុជាលេចធ្លោ គឺការកសាងកេរ្តិ៍ឈ្មោះប្រទេសកម្ពុជាជាគោលដៅទេសចរណ៍បេតិកភណ្ឌ និងការរកទីផ្សារនៅក្នុងបណ្ដាញភ្ញៀវទេសចរបេតិកភណ្ឌ។ គេគួរបង្កើតឲ្យមានផលិតផលទេសចរណ៍ជាក់លាក់ និងស្វែងរកទីផ្សារទេសចរណ៍។ ឧទាហរណ៍មួយគឺការបង្កើតផតថល (Portal) មួយដែលមានលក្ខណៈពិសេសសំរាប់ការទស្សនាប្រាសាទ (ប្រាសាទដែលល្អជាងគេចំនួន១០០) និងការជំរុញទេសចរណ៍បេតិកភណ្ឌកម្ពុជា។ គេហទំព័រនេះអាចរួមចំណែកដល់ការបង្កើនការចាប់អារម្មណ៍ចំពោះប្រទេសកម្ពុជា ជាគោលដៅទេសចរណ៍បេតិកភណ្ឌ និងបង្កើនទេសចរណ៍ក្នុងស្រុកក៏ដូចជាទេសចរណ៍អន្តរជាតិផងដែរ។
ផ្នែកឯកជនស្នើសុំឲ្យក្រសួងទេសចរណ៍កសាងកេរ្តិ៍ឈ្មោះទេសចរណ៍ប្រទេសកម្ពុជាជាគោលដៅទេសចរណ៍បេតិកភណ្ឌមួយ និងស្នើសុំភ្នាក់ងារផ្ដល់ជំនួយជួយផ្ដល់មូលនិធិដើម្បីបង្កើតគេហទំព័រដែលធ្វើឲ្យភ្ញៀវទេសចរបានស្គាល់ប្រាសាទបេតិកភណ្ឌសំខាន់ៗ។ បង្កើតគោលដៅទេសចរណ៍ទីពីរនៅកម្ពុជា "ទេសចរណ៍ឆ្នេរសមុទ្រ និងទេសចរណ៍ប្រកបដោយការទទួលខុសត្រូវ"។ អ្នកធ្វើដំណើរមកកម្ពុជាភាគច្រើនទស្សនាប្រាសាទប៉ុន្តែពួកគេចង់ចំណាយពេលសំរាកនៅឆ្នេរសមុទ្រផងដែរ។ ប្រទេសកម្ពុជាកំពុងបាត់បង់ភ្ញៀវទេសចរណ៍ដែលទស្សនាប្រាសាទអង្គរដោយសារពួកគេបែរជាទៅទស្សនាឆ្នេរសមុទ្រដែលមានការរៀបចំបានល្អដូចជាកោះសាមុយ ភូកេត បាលី និងសូម្បីតែវៀតណាម។ អ្នកធ្វើដំណើរកាន់តែច្រើនឡើងៗចង់ធ្វើដំណើរទស្សនាអ្វីដែលមានផលល្អចំពោះបរិស្ថាន។ ហេតុនេះទេសចរណ៍ប្រកបដោយការទទួលខុសត្រូវក្លាយទៅជាគោលគំនិតរកទីផ្សារដ៏ល្អ។ ក្រុមការងារស្នើសុំឲ្យកម្ពុជាជំរុញឲ្យទីផ្សារអ្នកទេសចរដែលសំរាកវិស្សមកាលមកទស្សនាឆ្នេរសមុទ្រដែលនេះស្របទៅនឹងការទាមទារឲ្យមានទេសចរណ៍ប្រកបដោយការទទួលខុសត្រូវ។ "រដ្ឋាភិបាលមានគោលដៅយុទ្ធសាស្ត្រពីរ ប្រាសាទបុរាណ និងអេកូ-ទេសចរណ៍"៕