លោក វង សូត មានប្រសាសន៍នៅក្នុងកិច្ចប្រជុំ (រូបថត ៖ នីកា)ភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈ បានបើកកិច្ចប្រជុំផ្សព្វផ្សាយប្រកាសស្ដីពីតាវកាលិកហានិភ័យការងារ ក្រោមអធិបតីភាព លោក វង សូត រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី ១៥ ខែ សីហា ឆ្នាំ ២០០៨ នៅឯសណ្ឋាគារកាំបូឌីយ៉ាណា។
នាឱកាសនោះ លោក វង សូត បានមានប្រសាសន៍ថា ដោយវិស័យសន្តិសុខសង្គមជាវិស័យមួយថ្មីសម្រាប់កម្ពុជា ការរៀបចំដំណើរការអនុវត្តវិស័យនេះ តម្រូវឲ្យមានការគិតគូរច្បាស់លាស់ដោយប្រុងប្រយ័ត្ន ធ្វើយ៉ាងណាឲ្យការគ្រប់គ្រងវិស័យនេះទទួលបាននូវប្រសិទ្ធភាព និងតម្លាភាពធានាបាននូវតាវកាលិកសន្តិសុខសង្គម ជូនកម្មករនិយោជិតដែលរងគ្រោះឲ្យបានលឿន និងត្រឹមត្រូវតាមច្បាប់។
លោករដ្ឋមន្ត្រីបានបញ្ជាក់ថា ក្នុងគោលបំណងធានាបាននិរន្តរភាពចំពោះការវិនិយោគ ក៏ដូចជាការធានានិរន្តរភាពចំពោះការការពារកម្មករនិយោជិត ពេលជួបប្រទះហានិភ័យជាយថាហេតុ យើងបានរៀបចំដំណើរការប្រព័ន្ធសន្តិសុខសង្គម ដែលមានចែងក្នុងច្បាប់ជាជំហានៗ តាមដំណាក់កាលនីមួយៗ ស្របតាមស្ថានភាពសេដ្ឋកិច្ចសង្គមជាក់ស្ដែងរបស់កម្ពុជា។ ក្នុងដំណាក់កាលដំបូងយើងចាប់ផ្ដើមអនុវត្តចំពោះផ្នែកហានិភ័យការងារ ដែលក្នុងនោះមានការធានារ៉ាប់រងតែលើផ្នែកគ្រោះថ្នាក់ការងារ និងជំងឺវិជ្ជាជីវៈប៉ុណ្ណោះ។ ចំពោះផ្នែកដទៃទៀតមានជាអាទិ៍ ផ្នែកធានារ៉ាប់រងសុខភាព និងផ្នែកប្រាក់សោធនជាដើម យើងនឹងបង្កើតឲ្យមានជាបន្តបន្ទាប់តាមផែនការដែលបានគ្រោងទុក។
លោកបានសម្ដែងនូវក្ដីសង្ឃឹមថា បន្ទាប់ពីការផ្សព្វផ្សាយនេះទៅ អស់លោក លោកស្រីទាំងអស់ដែលជាថ្នាក់ដឹកនាំសហជីពគ្រប់លំដាប់ថ្នាក់ដែលបានអញ្ជើញចូលរួមនៅពេលនេះនឹងបានយល់ជ្រួតជ្រាបអំពីសារប្រយោជន៍ និងការចាំបាច់នៃការបង្កើតឲ្យមានប្រព័ន្ធសន្តិសុខសង្គមនៅកម្ពុជា ជាពិសេសនៅចំពោះមុខនេះអស់លោក លោកស្រីនឹងបានយល់អំពីបែបបទនៃការទាមទារតាវកាលិកក្នុងករណីដែលមានគ្រោះថ្នាក់ការងារជាយថាហេតុកើតឡើង៕