ភ្ញៀវទេសចរបរទេសគ្រប់ជាតិសាសន៍ មកទស្សនាខេត្តសៀមរាប និងរយៈពេល៧ខែដើមឆ្នាំនេះ មានភ្ញៀវទេសចរប្រមាណ ៦៤៣.៨៩០នាក់ (រូបថត៖ គូលែន)សៀមរាប៖ ទោះបីជម្លោះនៅតំបន់ប្រាសាទព្រះវិហារ និងតំបន់ប្រាសាទតាមាន់ ខេត្តឧត្តរមានជ័យបញ្ហាប្រឈមមុខជាមួយនឹងទាហានសៀមឈ្លានពានក៏ដោយ ក៏គេសង្កេតឃើញថា ភ្ញៀវទេសចរគ្រប់ជាតិសាសន៍នៅតែបន្តចូលមកទស្សនាកម្សាន្តតំបន់ទេសចរនានាក្នុងខេត្តសៀមរាបពុំមានការធ្លាក់ចុះឡើយ។
បើតាមស្ថិតិ ចំនួនភ្ញៀវទេសចរបរទេសដែលមន្ទីរទេសចរណ៍ខេត្តសៀមរាបផ្ដល់ឲ្យកាសែតរស្មីកម្ពុជាកាលពីថ្ងៃទី១៨ខែសីហានេះបានបង្ហាញឲ្យឃើញថា រយៈពេល៧ខែដើមឆ្នាំនេះ ខេត្តសៀមរាបទទួលបានភ្ញៀវទេសចរបរទេសចំនួនប្រមាណ ៦៤៣.៨៩០នាក់។ តួលេខនោះបានបង្ហាញទៀតថា នៅ៦ខែដើមឆ្នាំខេត្តទទួលបានភ្ញៀវទេសចរបានចំនួន៥៧៧.៩៩៤នាក់។ ដោយឡែកខែកក្កដា២០០៨កន្លងទៅនេះភ្ញៀវទេសចរមានចំនួន៦៥.៨៩៦នាក់។
គួររំលឹកថា កាលពីខែកក្កដាឆ្នាំ២០០៧កន្លងទៅ ខេត្តសៀមរាបទទួលបានភ្ញៀវទេសចរបរទេសចំនួន៦២.៩៧៦នាក់។ ប៉ុន្តែក្នុងខែកក្កដាឆ្នាំ២០០៨នេះ ខេត្តសៀមរាបទទួលបានភ្ញៀវទេសចរបានចំនួន៦៥.៨៩៦នាក់ឃើញមានសន្ទុះកើនឡើងប្រមាណ៤,៦៣ភាគរយបើប្រៀបធៀបរយៈពេលមួយខែដូចគ្នា។
កាលពីឆ្នាំ២០០៧កន្លងទៅទូទាំងប្រទេសកម្ពុជាយើងទទួលបានភ្ញៀវទេសចរបរទេសបានចំនួនប្រមាណជាង២លាននាក់។ ដោយឡែកខេត្តសៀមរាបទទួលបានភ្ញៀវទេសចរចំនួន១.១០០.០០០នាក់។ ក្នុងនោះភ្ញៀវទេសចរជនជាតិកូរ៉េនៅតែឈរលំដាប់ទី១ ជប៉ុនលំដាប់ទី២ តៃវ៉ាន់លំដាប់ទី៣ និងលំដាប់ទី៤ គឺអាមេរិក។បើតាមព្យាករណ៍របស់ក្រសួងទេសចរណ៍បានបង្ហាញថា ឆ្នាំ២០០៨នេះកម្ពុជាអាចទទួលភ្ញៀវទេសចរបានប្រមាណ៣លាននាក់។
លោក គុជ លីណា អគ្គនាយករងសណ្ឋាគារសោមាទេវីអង្គរ និងស្ប៉ាខេត្តសៀមរាប បានមានប្រសាសន៍ថា ទោះបីជាតាមព្រំដែនកម្ពុជា-ថៃមានការប្រឈមមុខដាក់គ្នាដោយទាហានសៀមចូលមកឈ្លានពានទឹកដីកម្ពុជាផ្នែកខ្លះក៏ដោយ ក៏ភ្ញៀវទេសចរបរទេសពុំមានការថយចុះសម្រាប់មកកម្សាន្តនៅខេត្តសៀមរាបឡើយ។
លោកបានបញ្ជាក់ទៀតថា សណ្ឋាគារលំដាប់ផ្កាយ៤ មានចំនួន១៥០ បន្ទប់គឺក្នុងមួយខែមានភ្ញៀវទេសចរមកស្នាក់នៅពី៥៥ទៅ៦០ភាគរយឯណោះ។ ពិតមែនតែបច្ចុប្បន្នដល់រដូវធ្លាក់ស្រុតចុះនៃភ្ញៀវទេសចរយ៉ាងណាក៏ដោយ។ ដោយឡែកភ្ញៀវកើនឡើងខ្ពស់ចាប់ពីខែវិច្ឆិកា ឬធ្នូដល់មេសាជារៀងរាល់ឆ្នាំ។
លោក គុជ លីណា បានបន្តថា ការកើនឡើងនៃភ្ញៀវទេសចរគឺដោយសារប្រមុខរាជរដ្ឋាភិបាលកម្ពុជា ក្រោមការដឹកនាំដោយសម្ដេចអគ្គមហាសេនាបតីតេជោ ហ៊ុន សែន ធ្វើឲ្យប្រទេសមានសុខសន្តិភាព ហើយភ្ញៀវទេសចរគ្រប់ជាតិសាសន៍ គេមិនមានភាពភ័យខ្លាច ទើបជាកំណើនភ្ញៀវទេសចរពុំមានការថយចុះបែបនេះ។
ដោយឡែកលោក ពៅ ពិសិដ្ឋអភិបាលរងខេត្តសៀមរាបបាននិយាយប្រាប់រស្មីកម្ពុជាដែរថា ខេត្តសៀមរាបមានសុខសន្តិភាព នយោបាយល្អបំផុតដែលភ្ញៀវទេសចរបរទេសគេមកទស្សនាកម្សាន្តក្នុងខេត្តសៀមរាបពុំមានការបារម្ភពីសុវត្ថិភាព។
លោក ពៅ ពិសិដ្ឋ បានបន្តថា នៅពេលថ្មីៗនេះដែរ ខេត្តសៀមរាបដែលមានគណៈបញ្ជាការឯកភាពខេត្ត ដែលជាអ្នកគ្រប់គ្រងសភាពការណ៍សន្តិសុខសង្គមទូទៅបានចេញសារាចរណែនាំមួយពង្រឹងសុវត្ថិភាពសារាចរដើម្បីឲ្យប្រជាពលរដ្ឋទាំងអស់ត្រូវគោរពច្បាប់សារាចរឲ្យបានល្អគ្រប់ៗគ្នា ដើម្បីលើកស្ទួយមុខមាត់ខេត្ត ក៏ដូចជាលើកស្ទួយវិស័យទេសចរណ៍ទូទាំងខេត្តសៀមរាបទៀតផង។ សារាចរណែនាំនោះតម្រូវឲ្យធ្វើការដាក់ពិន័យយ៉ាងធ្ងន់ធ្ងរដល់អ្នកប្រព្រឹត្តបទល្មើសសារាចរទៀតផង។
លោកបន្តថា ភ្ញៀវទេសចរទាំងអស់អាចមកកម្សាន្តស្នាក់នៅខេត្តសៀមរាបបានយ៉ាងរីករាយ ដោយមិនព្រួយពីសុវត្ថិភាពផ្ទាល់ខ្លួនឡើយ៕