ខេត្តព្រះវិហារ៖ ក្មេងស្រីរងគ្រោះម្នាក់ត្រូវបានក្រុមក្មេងស្ទាវចំនួន៤នាក់ចាប់រំលោភបានសម្រេចទាំង៤នាក់កាលពីពេលបុណ្យចូលឆ្នាំថ្មីកន្លងទៅនៅខាងត្បូង វត្តគូលែន។
ហេតុការណ៍ក្រុមស្ទាវចាប់រំលោភក្មេងស្រីរងគ្រោះនេះបានកើតឡើងកាលពីពេលថ្មីៗនេះ ស្ថិតនៅខាងត្បូងវត្តចម្ងាយ៥០០ម៉ែត្រនៅក្នុងភូមិបបុស ឃុំភ្នំពេញ ស្រុកគូលែន ខេត្តព្រះវិហារ។
សមត្ថកិច្ចស្រុកបានឲ្យកម្ពុជាថ្មីដឹងថា ទាក់ទិនទៅនិងករណីរំលោភនោះមកពីម្ដាយក្មេងស្រីរងគ្រោះមិនប្រញាប់មកប្ដឹងសមត្ថកិច្ចស្រុក រវល់តែយកកូនរបស់គាត់ទៅមន្ទីរពេទ្យ ដើម្បីព្យាបាលដោយគាត់មានការភ័យខ្លាចកូនរបស់ខ្លួនស្លាប់ ហើយម្ដាយក្មេងស្រីរងគ្រោះទើបតែទៅដាក់ពាក្យបណ្ដឹងនៅអធិការនគរបាលស្រុកគូលែនលានកាលពីព្រឹកថ្ងៃទី២២ ខែមេសា ឆ្នាំ២០០៨ ហើយលោកអធិការនគរបាលស្រុកក៏បានបញ្ជូនសំណុំរឿងទៅព្រហ្មទ័ណ្ឌកំរិតធ្ងន់ ស្នងការនគរបាលខេត្តព្រះវិហារ ដើម្បីចាត់ការរឿងនេះ។
តាមការរៀបរាប់ពីម្ដាយក្មេងស្រីរងគ្រោះឈ្មោះ សាយ សួ បានឲ្យដឹងថា មុនដំបូងកូនរបស់គាត់បានទៅដើរទៅនៅនឹងវត្តជាមួយគេឯង លុះទៅដល់ចំណុចកើតហេតុក៏មានជនល្មើសចំនួន៤នាក់បានមកចាប់បី ខ្ទប់មាត់យកចូលទៅក្នុងព្រៃខាងត្បូងវត្តហើយក៏ធ្វើសកម្មភាពចាប់រំលោភម្ដងម្នាក់ៗរហូតបានសម្រេចទាំងអស់គ្នា ហើយក្មេងស្រីរងគ្រោះសន្លប់អត់ដឹងខ្លួនរហូតដល់វេលាម៉ោង១២យប់ទើបក្មេងស្រីរងគ្រោះភ្ញាក់ដឹងខ្លួនឡើងក៏ឃើញជនល្មើសទាំង៤នាក់នៅដេកទីនោះ ហើយក្មេងរងគ្រោះក៏រត់មកផ្ទះវិញក៏សន្លប់ម្ដងទៀត ហើយម្ដាយក្មេងស្រីរងគ្រោះបានឲ្យដឹងថា កូនរបស់គាត់មានឈ្មោះ ដ.អ អាយុ១៥ឆ្នាំ រស់នៅភូមិ-ឃុំកើតហេតុខាងលើ។
នៅពេលទទួលបានពាក្យបណ្ដឹងពីម្ដាយក្មេងស្រីរងគ្រោះលោកខៀវលោមអង់ ប្រធានព្រហ្មទ័ណ្ឌកម្រិតធ្ងន់ធ្ងរនៃស្នងការដ្ឋាននគរបាលខេត្តព្រះវិហារបានបញ្ជូនសំណុំរឿងទៅតុលាការខេត្ត ដើម្បីសុំដីកាពីតុលាការតាមស្វែងការចាប់ខ្លួនជនល្មើសទាំង៤នាក់ខាងលើយកមកផ្ដន្ទាទោសទៅតាមផ្លូវច្បាប់ឲ្យទាល់តែបាន៕