ភ្នំពេញ ៖ ពន្ធលើមធ្យោបាយដឹកជញ្ជូន និងយានជំនិះបានដំណើរប្រមូលពន្ធចាប់ពីថ្ងៃទី១៥ ខែសីហា ឆ្នាំ២០០៨ នេះតទៅរហូតដល់ថ្ងៃទី១៥ ខែវិច្ឆិកា ឆ្នាំ២០០៨ ដោយសាលាក្រុងភ្នំពេញ បានកំណត់ទីតាំងចំនួន៤០គោលដៅក្នុងរាជធានីភ្នំពេញ។
តាមប្រភពព័ត៌មានពីមន្ត្រីសាខាពន្ធដាររាជធានីភ្នំពេញបានបញ្ជាក់ថា ការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសំរាប់ឆ្នាំ២០០៨នេះធ្វើឡើងតាមសេចក្ដីប្រកាសរបស់ក្រសួងលេខ៥៤៧សហវប្រក.ពដនិងសេចក្ដីជូនដំណឹងលេខ០១៩សហវពដចុះថ្ងៃទី៣០ ខែកក្កដា ឆ្នាំ២០០៨ ហើយជាមួយគ្នានោះដែរនាយកដ្ឋានពន្ធដារក៏បានចេញលិខិតមួយច្បាប់លេខ៧៥០ពដចុះថ្ងៃទី១៤ ខែសីហា ឆ្នាំ២០០៨ស្ដីពីបែបបទ និងនីតិវិធីនៃការប្រមូលពន្ធនេះផងដែរ។ ជុំវិញបញ្ហានេះត្រូវបានត្រៀមសកម្មភាពទូទាំងប្រទេសកម្ពុជាគ្រប់ខេត្ត - ក្រុង ទាំងអស់ដោយឡែកនៅរាជធានីភ្នំពេញបានត្រៀមគោលដៅចំនួន៤០កន្លែងឯណោះហើយមាន៤៧ក្រុម និងមានមន្ត្រីជាង១០០នាក់ដាក់ប្រចាំការសំរាប់ការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ។ ក្នុងខ័ណ្ឌនីមួយៗមានគោលដៅពី៤ -៧កន្លែង បើប្រៀបទៅច្រើនជាងឆ្នាំមុនៗ ហើយតាមគោលដៅនីមួយៗមានចងបដាជូនដំណឹងត្រឹមត្រូវតាមសេចក្ដីណែនាំរបស់សាលាក្រុងភ្នំពេញបន្ទាប់ពីអនុម័តហើយនោះ។
ប្រភពព័ត៌មានបន្តថាឆ្នាំ២០០៨នេះ រថយន្តគ្រប់ប្រភេទនៅតែបន្តអនុវត្តនីតិវិធីប្រមូលពន្ធដូចគ្នាឆ្នាំដដែល។ មានន័យថា ការមកបង់ពន្ធត្រូវភ្ជាប់នូវឯកសារឆ្នាំចាស់ឬលិខិតបញ្ជាក់ផ្សេងៗដោយភ្ជាប់មកជាមួយដូចជាលិខិតឆ្លើយប្រកាសបង់ពន្ធ និងទទួលបង្កាន់ដៃបង់ពន្ធ និងប័ណ្ណបិទភ្ជាប់កញ្ចក់រថយន្តដូចឆ្នាំមុនៗ តែដោយឡែកទោចក្រយានយន្ត (ម៉ូតូ) ទិញប័ណ្ណបិទភ្ជាប់ជាការស្រេចមិនតំរូវឲ្យបំពេញបែបបទអ្វីទៀតទេ។ ការត្រួតពិនិត្យបង់ពន្ធនេះចំពោះរថយន្តនៅរក្សាការផ្ទៀងផ្ទាត់បង្កាន់ដៃបង់ពន្ធ ប័ណ្ណបិទភ្ជាប់កញ្ចក់រថយន្តទៅនឹងលក្ខណៈយានយន្តដូចឆ្នាំកន្លងមកដដែល រីឯម៉ូតូត្រូវត្រួតពិនិត្យដោយប្រើឧបករណ៍ពិនិត្យគុណភាពប័ណ្ណនោះ និងផ្ទៀងផ្ទាត់អំពីទឹកប្រាក់បង់ពន្ធដែលមានចុះនៅលើប័ណ្ណជាមួយទំហំស៊ីឡាំងយានយន្តដែលត្រូវប្រើឬត្រូវបិទតែប៉ុណ្ណោះ។
មន្ត្រីសាខាពន្ធដាររាជធានីភ្នំពេញបានសំណូមពរដល់ម្ចាស់យានយន្តទាំងអស់ ពិសេសម្ចាស់ទោចក្រយានយន្ត (ម៉ូតូ) គប្បីយកចិត្តទុកដាក់នូវចំណុចសំខាន់ៗមួយចំនួនដូចជាទី១- ពិនិត្យលក្ខណៈយានយន្តរបស់ខ្លួនឲ្យបានច្បាស់លាស់ឬថតចម្លងលិខិតសំគាល់យានយន្ត (កាតគ្រី) ឬសរសេរបញ្ជាក់លក្ខណៈយានយន្តនៅលើក្រដាសតូចមួយដែលមានទំហំប៉ុនលិខិតសំគាល់យានយន្តរួចដាក់ឈ្មោះអាសយដ្ឋានប្រភេទកំលាំងយានយន្តដើម្បីភ្នាក់ងារពន្ធដារងាយស្រួលលក់ប័ណ្ណតំរូវយានយន្តទាំងនោះបានឆាប់រហ័ស។ ទី២- ត្រូវជ្រើសរើសយកចំណុចណាមួយលើគំរបផុកខាងមុខ រួចហើយជូតសំអាតមុនពេលបិទប័ណ្ណនេះដោយហាមការបកបិទចុះឡើងដែលនាំឲ្យប័ណ្ណនោះជ្រីវជ្រួញឬដាច់ជ្រុងណាមួយធ្វើឲ្យបាត់បង់គុណភាព ដែលមិនអាចយកជាការបាន។ ទី៣- ត្រូវធ្វើការថែរក្សាប័ណ្ណបិទភ្ជាប់នេះឲ្យបានល្អ និងនៅជាប់យានយន្តជានិច្ច។ ទី៤- ការបាត់ប័ណ្ណទាំងស្រុង ឬមួយចំណែកណា ឬជ្រីវជ្រួញ គឺជាភាពមិនប្រក្រតី គប្បីទិញប័ណ្ណថ្មីបិទជំនួសវិញភ្លាម ហើយប័ណ្ណចាស់នោះមិនអាចយកទៅបិទលើយានយន្តផ្សេងបានឡើយ ទី៥- ពិនិត្យប្រាក់ពន្ធត្រូវបង់ និងបង់ឲ្យត្រូវតាមចំនួនទឹកប្រាក់ដែលមានលេខក្នុងប័ណ្ណបិទភ្ជាប់នេះ ទី៦- មកប្រកាសបង់ពន្ធនេះ[ឲ្យ]បានទាន់ពេលវេលាកំណត់ថ្ងៃទី១៥ ខែសីហា ដល់ថ្ងៃទី១៥ ខែវិច្ឆិកា ឆ្នាំ២០០៨ ចៀសវាងនូវការប្រជ្រៀតគ្នាបង់នាចុងកាលបរិច្ឆេទ ទី៧- បង់ពន្ធនៅតាមគោលដៅដែលសាលាក្រុងបានកំណត់ ដែលកន្លែងប្រមូលពន្ធនីមួយៗមានភ្នាក់ងារពន្ធដារ ភ្នាក់ងាររក្សាសន្តិសុខសណ្ដាប់ធ្នាប់តំណាងអាជ្ញាធរដែនដីសង្កាត់។ កន្លែងប្រមូលពន្ធនីមួយៗសុទ្ធតែមានចងផ្ទាំងក្រណាត់ពណ៌ទឹកប៊ិករំលេចអក្សរពណ៌ស ស្ដីពីការប្រមូលពន្ធ។ ទី៨- ហាមដាច់ខាតការទិញប័ណ្ណដែលដាក់លក់ជាលក្ខណៈបុគ្គល ស្ថិតក្រៅគោលដៅរបស់សាលាក្រុងភ្នំពេញកំណត់។
ជុំវិញការប្រមូលពន្ធសំរាប់ឆ្នាំ២០០៨ នេះខាងសាខាពន្ធដាររាជធានីភ្នំពេញ បានសង្ឃឹមជឿជាក់យ៉ាងមុតមាំថា ម្ចាស់យានយន្តទាំងអស់ពិតជាចូលរួមយ៉ាងល្អប្រសើរជាពុំខានឡើយ ដើម្បីប្រមូលថវិកាសំរាប់បង់ពន្ធជូនរដ្ឋ៕