កាលពីថ្ងៃទី ៣០ ខែ ឧសភា ឆ្នាំ២០០៨ វេលាម៉ោង ១០.០០ព្រឹក ដល់ ម៉ោង ១២.០០ ថ្ងៃត្រង់ កម្មវិធីស្ត្រី នៃអង្គការវិទ្យាស្ថានបើកទូលាយ បានរៀបចំកិច្ចប្រជុំវេទិកាស្ត្រី លើកទី៣ ស្ដីពី « ស្ត្រី និងបច្ចេកវិទ្យា គមនាគមន៍ ព័ត៌មានវិទ្យា: ការប្រឈម និង ដំណោះស្រាយ » នាអង្គការវិទ្យាស្ថានបើកទូលាយ។
កិច្ចប្រជុំវេទិកាស្ត្រីត្រូវបានរៀបចំឡើងក្នុងគោលបំណង៖
១.ស្វែងយល់ និងវិភាគអំពីប្រភពនៃបញ្ហាការរើសអើង និងទំនាក់ទំនងរវាងហេតុនិងផល
២.ធ្វើការវិភាគ ស្វែងរកយុទ្ធសាស្ត្រ និងការតស៊ូមតិសមស្រប សម្រាប់ដំណោះស្រាយជារួម
៣.បញ្ជ្រាបការយល់ដឹងអំពីសិទ្ធិ ដើម្បីឈានទៅរកការលប់បំបាត់នូវការរើសអើង បង្កើន សមត្ថភាពចាំបាច់ និងសមត្ថភាពក្នុងភាពជាអ្នកដឹកនាំសម្រាប់ស្ត្រី
ចូលរួមក្នុងឱកាសនោះ មានតំណាងមកពីស្ថាប័នរដ្ឋាភិបាល អគ្គលេខាធិការដ្ឋានព្រឹទ្ធសភា អង្គការធ្វើការងារអំពីស្ត្រីនិង សិទ្ធិ និងតំណាងស្ថាប័នសារព័ត៌មាននៅក្នុងស្រុក។
អង្គប្រជុំបានផ្ដោតការពិភាក្សាលើបញ្ហាពីរ៖ទី១ គោលនយោបាយរបស់រដ្ឋាភិបាលសម្រាប់ជំរុញ និងលើកទឹកចិត្តស្ត្រី ក្នុងការចូលរួមឲ្យបានច្រើនក្នុងវិស័យបច្ចេកវិទ្យា គមនាគមន៍ ព័ត៌មានវិទ្យា(Information and Communication Technology-ICT) ។ ទី២ សំណូមពរផ្សេងៗទាក់ទងស្ត្រី និងការប្រើប្រាស់បច្ចេកវិទ្យា គមនាគមន៍ ព័ត៌មានវិទ្យា
អង្គប្រជុំបានពិភាក្សាយ៉ាងផុសផុល និងបានឃើញថា រដ្ឋាភិបាលមានគោលនយោបាយជាច្រើនក្នុងការជំរុញការចូលរួមរបស់ស្ត្រីក្នុងគ្រប់សកម្មភាពនយោបាយនិងសង្គម ដូចជាគោលនយោបាយបញ្ជ្រាបយេនឌ័រ ដែលមានចែងក្នុងយុទ្ធសាស្ត្រចតុកោណ និងមានកំណត់ក្នុងគោលដៅសហសវត្ត ជាដើម។ តែរហូតមកដល់ពេលបច្ចុប្បន្ននេះ យើងហាក់មិនទាន់ឃើញមានគោលនយោបាយណាមួយជាក់លាក់របស់រដ្ឋាភិបាលសម្រាប់ជំរុញការចូលរួមរបស់ស្ត្រីនៅក្នុងវិស័យ បច្ចេកវិទ្យា គមនាគមន៍ ព័ត៌មានវិទ្យា និងប្រព័ន្ធផ្សព្វផ្សាយនៅឡើយទេ។ អង្គប្រជុំបានពិភាក្សា និងសង្កេតឃើញដែរថា ក្នុងរបាយការណ៍របស់ក្រសួងកិច្ចការនារី ចំនួនពីរដែលបានផ្ញើទៅអង្គការសហប្រជាជាតិនៅខែឧសភាឆ្នាំ ២០០០និងនៅខែ តុលាឆ្នាំ ២០០៤ ហាក់ពុំបានលើកឡើងអំពីបញ្ហាស្ត្រីនិងប្រព័ន្ធផ្សព្វផ្សាយឡើយ។ ទាក់ទងការប្រើប្រាស់ ICT អង្គប្រជុំយល់ឃើញថា ដោយសារសេវាកម្មអ៊ីនធឺណិតនៅមានតម្លៃថ្លៃ ជាមូលហេតុមួយធ្វើឲ្យស្ត្រីភាគច្រើន ដែលជាអ្នករកចំណូលបានតិច មិនអាចមានលទ្ធភាពប្រើប្រាស់នូវICT ឲ្យអស់លទ្ធភាព។
អង្គប្រជុំបានលើងឡើងនូវអនុសាសន៍មួយចំនួន ដើម្បីជំរុញការចូលរួមរបស់ស្ត្រីក្នុងការប្រើប្រាស់ICTឲ្យបានច្រើន ដោយសំណូមពរក្រសួងកិច្ចការនារី គួរមានការផ្សព្វផ្សាយឲ្យបានទូលំទូលាយ ថែមទៀត អំពីផែនការសកម្មភាពក្រុងប៉េកាំង(Beijing Platform) ដែលកម្ពុជា ជាប្រទេសហត្ថលេខីមួយ។ សំណូមពរ សុំឲ្យមានកិច្ចសហការរវាងរដ្ឋាភិបាល អង្គការមិនមែនរដ្ឋាភិបាល និង ប្រព័ន្ធផ្សព្វផ្សាយ ក្នុងការចូលរួមលើកកម្ពស់ការចូលរួមរបស់ស្ត្រី តាមរយៈការផ្សព្វផ្សាយអំពីជោគជ័យរបស់ស្ត្រីដែលមានជំនាញ បច្ចេកវិទ្យា គមនាគមន៍ ព័ត៌មានវិទ្យា។ អង្គប្រជុំក៏បានពិភាក្សានិងយល់ឃើញថា គួរមានការពិភាក្សាជាមួយរដ្ឋាភិបាលក្នុងការធ្វើយ៉ាងណាដើម្បីរំលេចបញ្ហាស្ត្រីក្នុងគោលនយោបាយ បច្ចេកវិទ្យា គមនាគមន៍ ព័ត៌មានវិទ្យា។ អង្គប្រជុំក៏បានសំណូមពររដ្ឋាភិបាល គួរពិនិត្យចំពោះតម្លៃនៃការផ្គត់ផ្គង់សេវាកម្មអ៊ីនធឺណិត ធ្វើយ៉ាងណាឲ្យសេវាកម្មនេះមានតម្លៃទាបសមរម្យ និងគួរមានកម្មវិធីបង្រៀនកុំព្យូទ័រចាប់ពីថ្នាក់បឋមសិក្សាប្រសិនបើអាចធ្វើបាន។
គួររំលឹកដែរថា កិច្ចប្រជុំវេទិកាស្ត្រីលើកទី១ បានរៀបចំឡើងកាលពីថ្ងៃទី ២៦ ខែកុម្ភៈ ឆ្នាំ២០០៨ និងទី២ នាថ្ងៃទី ១១ ខែ មេសា ឆ្នាំ ២០០៨។ របាយការណ៍នៃកិច្ចប្រជុំវេទិកាស្ត្រី លើកទី១ និងរបាយការណ៍នៃកិច្ចប្រជុំវេទិកាស្ត្រី ទី២ មាននៅលើវិបផតថលស្ដីអំពីស្ត្រី http://women.open.org.kh ៕