តាកែវ៖ មជ្ឈមណ្ឌលអភិវឌ្ឍន៍ជនបទខេត្តតាកែវ ដែលស្ថិតនៅ ភូមិព្រៃញឹាក ឃុំខ្វាវ ស្រុកសំរោង កាលពីចុងសប្ដាហ៍កន្លងមកនេះ បានប្រារព្ធពិធីបិទវគ្គបញ្ចប់ការបណ្ដុះបណ្ដាលវិជ្ជាជីវៈកាត់ដេរ ជួសជុលម៉ូតូ ម៉ាញ៉េ និងទូរទស្សន៍វគ្គទី១១ ក្រោមអធិបតីភាពលោក ធ សែន ប្រធានមន្ទីរអភិវឌ្ឍន៍ជនបទខេត្ត។
លោក ម៉ាន រ៉ាឌី នាយកមជ្ឈមណ្ឌលអភិវឌ្ឍន៍ជនបទខេត្តបានឲ្យដឹងថា វគ្គបណ្ដុះបណ្ដាលដែលបញ្ចប់នាពេលនេះ មាន៣ផ្នែក ដោយមានរយៈ៤ខែ ក្នុងនោះមានផ្នែកជួសជុលម៉ូតូ ផ្នែកជួសជុលម៉ាញ៉េ និងទូរទស្សន៍ និងផ្នែកកាត់ដេរសំលៀកបំពាក់ ដែលមានសិក្ខាកាមសរុបចំនួន៤៥នាក់មកពីស្រុកបសេដ្ឋ ខេត្តកំពង់ស្ពឺ ស្រុកសំរោង និងត្រាំកក់ ខេត្តតាកែវ ដែលជាស្ត្រីមេម៉ាយទីទ័លក្រ និងសិស្សដែលពុំមានលទ្ធភាពបន្តការសិក្សា។
លោក ម៉ាន រ៉ាឌី បានរំលឹកឲ្យដឹងថា មជ្ឈមណ្ឌលបានធ្វើការបណ្ដុះបណ្ដាលតាំងពីឆ្នាំ២០០៥មកដល់ពេលនេះបានបើកបង្រៀនកាត់ដេរ ជួសជុលម៉ូតូ និងម៉ាញ៉េ ទូរទស្សន៍ បានចំនួន១១វគ្គ មានសិក្ខាកាមសរុបចំនួន១៧០នាក់ស្រី៥០នាក់។
មានប្រសាសន៍ទៅកាន់សិក្ខាកាមនាពេលនោះលោក ធ សែន បានបញ្ជាក់ថា គោលនយោបាយរបស់រាជរដ្ឋាភិបាល ដែលសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីបានពង្រីកយ៉ាងធំទូលាយនូវកិច្ចការងារអភិវឌ្ឍន៍ដល់មូលដ្ឋាន ដើម្បីឲ្យប្រជាពលរដ្ឋឈានទៅរកកាត់បន្ថយភាពក្រីក្រជាបណ្ដើរៗ ជាពិសេសប្រជាពលរដ្ឋដែលមានជីវភាពខ្វះខាតនៅតាមជនបទដាច់ស្រយាល ត្រូវបានប្រែក្លាយពីភាពអត់ការងារធ្វើមកមានវិជ្ជាជីវៈអាចប្រកបមុខរបរចិញ្ចឹមជីវិតបានដោយស្រួល៕