ត្រាំកក់-តាកែវ៖ សិស្សានុសិស្សជាង១០០នាក់បានមកជួបជុំគ្នានៅសាលាស្រុកត្រាំកក់ ខេត្តតាកែវ កាលពីព្រឹកថ្ងៃទី១២ ធ្នូ ឆ្នាំ២០០៩ ដើម្បីចូលរួមក្នុងពិធីអបអរសាទរទិវាជាតិប្រយុទ្ធប្រឆាំងការជួញដូរមនុស្ស១២ធ្នូ។ ពិធីនេះរៀបចំឡើងដោយអង្គការគាំពារកុមារដែលងាយរងគ្រោះ VCAO ឧបត្ថម្ភដោយអង្គការដែនដីមនុស្ស TDH-Nether land តាមរយៈសម្ព័ន្ធអង្គការមិនមែនរដ្ឋាភិបាលប្រឆាំងការជួញដូរកុមារនៅកម្ពុជា។
លោក សុខ វិសុទ្ធ អ្នកសម្របសម្រួលកម្មវិធីអង្គការ VCAO បានឲ្យដឹងថា អង្គការការពារកុមារដែលងាយទទួលរងគ្រោះហៅកាត់ថា VCAO បានចាប់បដិសន្ធិឡើងនៅឆ្នាំ១៩៩៤ ដោយមានការទទួលស្គាល់ជាផ្លូវការពីរដ្ឋាភិបាល។ អង្គការនេះមានទីស្នាក់ការកណ្ដាលនៅទីក្រុងភ្នំពេញ។ អង្គការ VCAO ដំណើរសកម្មភាពរបស់ខ្លួនដោយមានការជួយឧបត្ថម្ភហិរញ្ញវត្ថុពីសំណាក់ម្ចាស់មូលនិធិនានា តាមគម្រោងកម្មវិធីនីមួយៗ ហើយមានទីតាំងនូវ៥ខេត្តក្រុង ដូចជាខេត្តកំពង់ឆ្នាំង កំពង់ចាម សៀមរាប តាកែវ និងទីក្រុងភ្នំពេញ។ ទិវា១២ឆ្នាំត្រូវបានធ្វើឡើងរាល់ឆ្នាំដោយអង្គការសមាជិករបស់ Asia ACTs ដែលមាន៧ប្រទេសនៅតំបន់អាស៊ីអាគ្នេយ៍នេះ។
លោកគា សុភូ អភិបាលស្រុកត្រាំកក់ បានមានប្រសាសន៍ ដោយគាំទ្រយ៉ាងពេញទំហឹងនូវរាល់សកម្មភាពរបស់អង្គការគាំពារកុមារដែលងាយទទួលរងគ្រោះ VCAO ដែលធ្វើកន្លងមកក៏ដូចជាពេលនេះដែលបានរៀបចំពិធីអបអរសាទរទិវាប្រយុទ្ធប្រឆាំងការជួញដូរមនុស្ស១២ធ្នូ២០០៩នេះឡើង៕
