យោងតាមមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងនៅថ្ងៃច័ន្ទ ម្សិលមិញនេះថា រោងចក្រកាត់ដេរ និងរោងចក្រស្បែកជើងចំនួន៥៥ នៅក្នុងប្រទេសកម្ពុជាត្រូវបានបើកឲ្យមានដំណើរការឡើងវិញហើយ បន្ទាប់ពីរោងចក្រ ចំនួន៩៣បានបិទទ្វារ មួយរយៈពេលកន្លងមក ដោយសារតែទទួលរងឥទ្ធិពល នៃវិបត្តិសេដ្ឋកិច្ចនិងហិរញ្ញវត្ថុពិភពលោក។
ថ្លែងក្នុងពិធីសន្និសីទជាតិលើកទី៤ ស្ដីពីទំនាក់ទំនងវិជ្ជាជីវៈឆ្នាំ២០០៩ វិបត្តិសេដ្ឋកិច្ចពិភពលោក និងទំនាក់ទំនងវិជ្ជាជីវៈនៅកម្ពុជា កាលពីថ្ងៃទី១៤ ខែធ្នូ ឆ្នាំ២០០៩ នៅឯសណ្ឋាគារអាំងទ័រកង់ទីណង់តាល់លោក អ៊ុំ មាន រដ្ឋលេខាធិការក្រសួងការងារ បានឲ្យដឹងថា ទោះបីមានព័ត៌មាន អំពីការងើបឡើងវិញខ្លះៗនៃកំណើនសេដ្ឋកិច្ច នៅតាមប្រទេសមួយចំនួនក៏ដោយក្រសួងបានកត់សម្គាល់ឃើញថា ពីខែមករា ដល់ខែវិច្ឆិកា ឆ្នាំ២០០៩នេះ នៅក្នុងវិស័យឧស្សាហកម្មកាត់ដេរសំលៀកបំពាក់ និងផលិតស្បែកជើងកម្ពុជា មានរោងចក្រចំនួន៩៣ បានបិទទ្វារធ្វើឲ្យបាត់បង់ការងារកម្មករ និយោជិតចំនួន៣៨.១៩០នាក់។ លោកបន្តថា ក៏ប៉ុន្តែ "រោងចក្រចំនួន ៥៥កន្លែង បានបើកថ្មី និងស្រូបយកកម្មករនិយោជិតចំនួន ១.១៧៣នាក់ ឲ្យចូលធ្វើការវិញដែរ"។
ទន្ទឹមនឹងនោះ រោងចក្រចំនួន៦០ដែលបានព្យួរកិច្ចសន្យាការងារ ចំពោះកម្មករនិយោជិតចំនួន ៣៥.៣៣៧នាក់ នោះបានបើកដំណើរការឡើងវិញប្រមាណ៥០ភាគរយ។ ដូច្នេះកម្មករនិយោជិតក្នុងវិស័យកាត់ដេរ ដែលបានបាត់បង់ការងារ មានប្រមាណជាង៣ម៉ឺននាក់ប៉ុណ្ណោះ។ លោកបញ្ជាក់ទៀតថា បច្ចុប្បន្ននេះរោងចក្រកាត់ដេរសំលៀកបំពាក់ និងផលិតស្បែកជើងនៅដំណើរការចំនួន៥១៦កន្លែង ដែលមានកម្មករនិយោជិតចំនួន ៣៥៨.៦៦០នាក់ ក្នុងនោះនៅរាជធានីភ្នំពេញ មានចំនួន៤១៨រោងចក្រ មានកម្មករនិយោជិតចំនួន ២៦២.៣២០នាក់ និងនៅតាមខេត្តមានចំនួន ៩៨រោងចក្រ មានកម្មករនិយោជិតចំនួន៩៦.៣៤០នាក់ធ្វើការ។
ជាមួយគ្នាផងដែរ លោក សុខ ឡោ នាយកប្រតិបត្តិរបស់មូលនិធិ ក្រុមប្រឹក្សាអាជ្ញាកណ្ដាល ក៏បានឲ្យដឹងផងដែរថា សន្និសីទនេះ គឺផ្ដោតទៅលើការយកចិត្តទុកដាក់ទៅលើប្រធានបទសំខាន់មួយ ស្ដីអំពីវិបត្តិសេដ្ឋកិច្ចពិភពលោក និងទំនាក់ទំនងវិជ្ជាជីវៈនៅកម្ពុជា។ នាយកប្រតិបត្តិរូបនេះបន្តថា ជាទូទៅវិបត្តិដែលមានឫសគល់ចេញពីវិស័យហិរញ្ញវត្ថុបានបង្កផលប៉ះពាល់ដល់សេដ្ឋកិច្ចជាក់ស្ដែងនៅទូទាំងពិភពលោក ហើយសម្រាប់ប្រទេសកម្ពុជា ការធ្លាក់ចុះគួរឲ្យកត់សម្គាល់ គឺការបញ្ជាទិញព្រមទាំងការបាត់បង់ប្រាក់ចំណេញ និងការបាត់បង់ការងារនៅក្នុងវិស័យកាត់ដេរ ដូចជាការចំណាយប្រាក់របស់ទេសចរណ៍ និងសភាពស្រុតចុះក្នុងសកម្មភាពសេដ្ឋកិច្ចនៅក្នុងផ្នែកសំណង់ និងអចលនទ្រព្យ គឺជាសូចនាករមួយចំនួននៃផលប៉ះពាល់នេះ។
លោក សុខ ឡោ បានបញ្ជាក់ផងដែរថា ក្នុងឆ្នាំ២០០៩នេះ "ក្រុមប្រឹក្សាអាជ្ញាកណ្ដាលបានទទួលសំណុំរឿងវិវាទចំនួន១៧២សំណុំរឿង"។ លោកបន្តថា ចំនួននេះគឺជាចំនួនមួយដែលច្រើនជាងសំណុំរឿងក្នុងឆ្នាំ២០០៨ ដោយក្នុងឆ្នាំ២០០៨ ទទួលបានសំណុំរឿងចំនួន១៥៩ប៉ុណ្ណោះ។ ចាប់តាំងពីបង្កបង្កើនក្រុមប្រឹក្សាអាជ្ញាកណ្ដាលនៅឆ្នាំ២០០៣មក ទោះបីជាក្រុមប្រឹក្សាអាជ្ញាកណ្ដាលជួបប្រទះនូវបញ្ហាប្រឈមនានា ដែលចាំបាច់ត្រូវតែដោះស្រាយក៏មែនពិតក៏ដោយ ប៉ុន្តែសំណុំរឿងប្រមាណជា៧០ភាគរយ ត្រូវបានដោះស្រាយប្រកបដោយជោគជ័យ ដោយក្រុមប្រឹក្សាអាជ្ញាកណ្ដាល។
សារព័ត៌មាន "ដើមអម្ពិល" បានទាក់ទងទៅលោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា អំពីការលើកឡើងរបស់មន្ត្រីក្រសួងការងារ និងបណ្ដុះបណ្ដាលវិជ្ជាជីវៈ តែលោកបានច្រានចោលទាំងស្រុងថា "ខ្ញុំមិនទាន់ឯកភាពចំពោះការលើកឡើងរបស់ក្រសួងទេ ដោយមើលឃើញថា សព្វថ្ងៃនេះកម្មករ-កម្មការិនីជាច្រើននាក់នៅតែមិនមានការងារធ្វើដដែល"។
ប្រធានសហជីពរូបនេះបន្តទៀតថា ការបើករោងចក្រចំនួន៥៥កន្លែងនោះ គ្រាន់តែជាការបើកប៉ុន្តែ តម្លៃឈ្នួលគឺមិនទៅតាមលក្ខណៈស្តង់ដារ ហើយអាចនឹងធ្វើកិច្ចសន្យារយៈពេលខ្លី លក្ខខណ្ឌការងារមិនល្អ បៀវត្សមិនសមរម្យផ្ដល់ឲ្យកម្មករ៕
