ភ្នំពេញ៖ ប្រធានក្រុមប្រឹក្សាជំនុំជម្រះ សាលាដំបូងរាជធានីភ្នំពេញ បានបើកសវនាការ ជាអសាធារណៈមួយ កាលពីព្រឹកថ្ងៃទី១៤ ខែធ្នូ ឆ្នាំ២០០៩ ពីបទរំលោភសេពសន្ថវៈ ដែលបានប្រព្រឹត្តទៅកាលពីថ្ងៃទី១៩ ខែមិថុនា ឆ្នាំ២០០៩ ខណ្ឌមានជ័យ រាជធានីភ្នំពេញ។
នៅក្នុងរង្វង់ក្រចកសេះ ជនជាប់ចោទ ស្ថិតក្នុងឯកសណ្ឋានអ្នកទោស ហើយពោរពេញទៅដោយទឹកមុខស្លេកស្លាំង អមទៅដោយមេធាវីការពារក្ដីឲ្យរូបគេ និងមេធាវី ការពារក្ដីឲ្យក្មេងស្រីរងគ្រោះ។ ជនជាប់ចោទ ឈ្មោះ ចាន់ ពៅ អាយុ៤៥ឆ្នាំ មានទីលំនៅ ភូមិតាង៉ូវ សង្កាត់និរោធ ខណ្ឌមានជ័យ មាន មុខរបរជាកសិករ។ ជននេះត្រូវបានចាប់ខ្លួនភ្លាមៗ កាលពីថ្ងៃទី១៩ ខែមិថុនា ឆ្នាំ២០០៩ ដោយនគរបាលប៉ុស្តិ៍និរោធ។
ប្រភពព័ត៌មានបានឲ្យដឹងថា ក្មេងស្រីដែលត្រូវគេបម្រុងចាប់រំលោភនោះ ឈ្មោះ រ.ក អាយុ១៣ឆ្នាំ ហើយមានទីលំនៅក្បែរ និងឲ្យផ្ទះជនជាប់ចោទ។ ដោយសវនាការ នេះអសាធារណ ទើបគេមិនដឹងថា រឿងនោះស៊ីជម្រៅបែបណាទេ។ ប៉ុន្តែនៅខាងក្រៅបន្ទប់សវនាការ ជនជាប់ចោទបានឲ្យភ្នាក់ងារកាសែតដើមអម្ពិលដឹងថា "ខ្ញុំពិតជាមានបំណងរំលោភក្មេងស្រីនោះមែន តែមិនទាន់បានរំលោភផង នគរបាលទៅដល់ក៏ឃាត់ខ្លួនខ្ញុំ" ជនជាប់ចោទបានបន្ថែមថា ក្មេងស្រីរងគ្រោះមានផ្ទះនៅជិតគ្នា។
ប្រភពព័ត៌មានបានបន្ថែមថា នៅមុនម៉ោងកើតហេតុ បុរសចំណាស់ល្មោភកាមបានលួង ក្មេងស្រីឲ្យឡើងជិះម៉ូតូដើរលេងជាមួយគ្នា លុះដល់ព្រៃស្ងាត់ មានដើមត្រែងជាច្រើនក៏ ឈប់ម៉ូតូ ហើយចាប់សម្រាតក្មេងស្រីនោះ ដោយយកដៃលេងប្រដាប់ភេទរបស់នាង រួចបម្រុងនឹងចាប់រំលោភ ក៏ត្រូវបាននគរបាលប៉ុស្តិ៍និរោធល្បាតទៅដល់ទីនោះ មានការសង្ស័យ ក៏ចុះទៅមើលហើយឃើញសកម្មភាពបែបខាងលើ ក៏ក្របួចយកមកនគរបាលប៉ុស្តិ៍តែម្ដង។
ក្រុមអ្នកច្បាប់បាននិយាយថា ទោះបីជាបុរសចំណាស់រូបនេះ ពុំទាន់រំលោភបាន សម្រេចក្ដី ក៏ត្រូវតែទទួលទោសពីបទរំលោភសេពសន្ថវៈដែរ ព្រោះបុរសនេះមានបំណងគិតទុកជាមុន។ ក្រុមអ្នកច្បាប់ទាំងនោះបានបន្ថែមថា បុរសចំណាស់រូបនេះ ប្រសិនបើតុលាការរកឃើញថា មានកំហុសពីបទរំលោភសេពសន្ថវៈមែននោះ ត្រូវប្រឈមមុខក្នុងការជាប់ពន្ធនាគារយ៉ាងតិច១០ឆ្នាំ។
ពាក្យចាស់និយាយថា "រពិសដៃផ្ទៃឆ្អែតតែ សម្រាប់បុរសចំណាស់រូបនេះ គឺរពិសដៃទៅ លូកប្រដាប់ភេទក្មេងស្រី ត្រូវតែដេកគុក"។ រឿងក្ដីនេះ គេមិនដឹងថា ភាគីឪពុកម្តាយក្មេងស្រីរងគ្រោះ ទាមទារប្រាក់ជំងឺចិត្តពីជនជាប់ចោទប៉ុន្មាននោះទេ ព្រោះតែសវនាការនេះអសាធារណៈ។ មិនតែប៉ុណ្ណោះ នៅព្រឹកថ្ងៃ ទី១៤ ខែធ្នូ ឆ្នាំ២០០៩ ដែលមានលោកកែ សាខន ជាប្រធានក្រុមប្រឹក្សាជំនុំជម្រះនិង លោកឯក ឆេងហួត ជាតំណាងអយ្យការមិនទាន់បានធ្វើការប្រកាសសាលក្រមផ្ដន្ទាទោស ជនជាប់ចោទនៅឡើយ ពោលគឺយកទៅ ប្រកាសនៅថ្ងៃខាងមុខ ដោយមិនកំណត់ថ្ងៃ។
បទល្មើសរំលោភសេពសន្ថវៈ គឺជនជាប់ចោទប្រឈម និងការជាប់ពន្ធនាគារពី១០ទៅ ១៥ឆ្នាំឯណោះ។
