ភ្នំពេញ៖ ក្រសួងកិច្ចការនារី ក្រសួងការងារ និងបណ្ដុះបណ្ដាលវិជ្ជាជីវៈបានបើកកិច្ចប្រជុំលើកទី៤ របស់ក្រុមការងារអន្តរក្រសួង ស្ដីពីទេសន្តរប្រវេសន៍នៅក្រសួងកិច្ចការនារី ដោយមានការចូលរួមពីលោកជំទាវ ប្រាក់ ចន្ថា រដ្ឋលេខាធិការក្រសួងការងារ លោកជំទាវ សាន្ត អរុណ រដ្ឋលេខាធិការក្រសួងកិច្ចការនារី ដោយមានការឧបត្ថម្ភពីអង្គការ UNIFEM-ILO។
នាព្រឹកថ្ងៃទី៣០ ខែមិថុនា ឆ្នាំ២០០៩នេះ លោកជំទាវ សាន្ត អរុណ រដ្ឋលេខាធិការក្រសួងកិច្ចការនារី បានបញ្ជាក់ថា រាជរដ្ឋាភិបាលកម្ពុជាបានចាត់វិធានការយ៉ាងម៉ឺងម៉ាត់សហការជាមួយមូលនិធិអង្គការសហប្រជាជាតិ ដើម្បីបង្កើតឡើងនូវក្រុមការងារអន្តរក្រសួងស្ដីពីទេសន្តរប្រវេសន៍ហៅកាត់ថា IMTM ដែលមាន រដ្ឋមន្ត្រីក្រសួងកិច្ចការនារី និងក្រសួងការងារជាសហប្រធានតំណាងក្រសួងពាក់ព័ន្ធ ដើម្បីធ្វើការងារលើបញ្ហាស្ត្រី និងការធ្វើចំណាកស្រុក។
លោកជំទាវបានមានប្រសាសន៍ថា ក្រុមការងារនេះបានដំណើរការចាប់តាំងពីឆ្នាំ១៩៩២មក គឺបានសហការយ៉ាងជិតស្និទ្ធជាមួយអង្គការនានា រួមគ្នាគ្រប់គ្រងប្រព័ន្ធទំនាក់ទំនងជាមួយស្ថានទូត ដើម្បីធានាឲ្យបាននូវពលករខ្មែរ ទទួលបានសេវាបឋមក្នុងការទទួលបាននូវព័ត៌មានផ្សេងៗទាក់ទិននឹងការធ្វើចំណាកស្រុក។
លោកជំទាវ ប្រាក់ ចន្ថា រដ្ឋលេខាធិការក្រសួងការងារបានបញ្ជាក់ដែរថា ថ្មីៗនេះក្រុមការងារអន្តរក្រសួង បាននិងកំពុងរៀបចំពង្រាងនូវគោលនយោបាយជាតិទេសន្តរប្រវេសន៍ ដើម្បីបង្កើនកិច្ចការពារផលប្រយោជន៍ពលករខ្មែរ ពិសេសស្ត្រីនិងកុមារឲ្យកាន់តែប្រសើរឡើង ក្នុងន័យកាត់បន្ថយសកម្មភាពចំណាកស្រុក ដោយប្រថុយប្រថាន ដែលនាំឲ្យមានការកេងប្រវ័ញ្ចពលកម្ម ការធ្វើទារុណកម្ម ការរំលោភផ្លូវភេទ និងការជួញដូរមនុស្ស។
លោកជំទាវបានបន្តថា ផ្ដើមចេញពីការបន្លាស់ទី ដោយហេតុផលផ្សេងៗគ្នារបស់ពលករកម្ពុជា ក្នុងនោះស្ត្រីដែលបានធ្វើការបន្លាស់ទីដោយបញ្ហាគ្រួសារមានចំនួន៥០% បើប្រៀបធៀបទៅនឹងបុរស ដែលមានតែ៣០%ប៉ុណ្ណោះ។
ក្នុងនេះដែរ អ្នកបន្លាស់ទីជាស្ត្រីកម្ពុជាបានប្រឈមមុខនឹងភាពងាយរងគ្រោះជាច្រើនផ្សេងទៀត ទៅតាមស្ថានការណ៍ផ្សេងៗគ្នានៅក្នុងដំណើរការនៃការបន្លាស់ទី តែងតែស្ថិតក្រោមទម្រង់នៃការរើសអើងផ្នែកយេនឌ័រ ការរំលោភសិទ្ធិមនុស្សនិងសិទ្ធិការងារផងដែរ៕
