រូបថត៖ The Mekong Timesប្រមុខរដ្ឋាភិបាលកម្ពុជា និងរដ្ឋាភិបាលគូវ៉េត នឹងត្រូវចុះហត្ថលេខាលើកិច្ចព្រមព្រៀងមួយចំនួននៅក្នុងជំនួបទ្វេភាគី នៅព្រឹកថ្ងៃច័ន្ទនេះ។ កិច្ចព្រមព្រៀងរវាងប្រទេសទាំងពីរ ដែលផ្ដោតសំខាន់លើវិស័យពាណិជ្ជកម្មវិនិយោគ រួមទាំងកិច្ចព្រមព្រៀងលើវិស័យប្រេង និងឧស្ម័ន។
លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស បានប្រាប់ក្រុមអ្នកកាសែតនៅព្រលានយន្តហោះអន្តរជាតិភ្នំពេញកាលពីថ្ងៃម្សិលមិញថា៖ "ក្នុងដំណើរទស្សនកិច្ចជាផ្លូវការរបស់នាយករដ្ឋមន្ត្រីនៃរដ្ឋគូវ៉េតមកកាន់កម្ពុជាពេលនេះ ប្រមុខរដ្ឋាភិបាលកម្ពុជា-គូវ៉េត នឹងចុះហត្ថលេខាលើឯកសារសំខាន់ៗចំនួន៤។ ទី១- កិច្ចព្រមព្រៀងពាណិជ្ជកម្ម។ ទី២- កិច្ចព្រមព្រៀងការពារវិនិយោគប្រទេសទាំងពីរ។ ទី៣- អនុស្សរណៈយោគយល់គ្នា (MOU) ស្ដីពីសហប្រតិបត្តិការរវាងក្រសួងការបរទេសទាំងពីរ រួមទាំងចុះហត្ថលេខាលើកិច្ចសហប្រតិបត្តិលើវិស័យប្រេង និងឧស្ម័ន"។
នាយករដ្ឋមន្ត្រីនៃរដ្ឋគូវ៉េត អ្នកអង្គម្ចាស់ ស្ហេក ណាស្សែរ អាល់ម៉ូហាម៉ាដ អាល់អាម៉ាដអាល់ហ្សប៊ែរ អាល់សាបា (Sheikh Nasser Al-Mohammad Al-Ahmad Al-Jaber Al-Sabah) កំពុងបំពេញទស្សនកិច្ចផ្លូវការនៅកម្ពុជារយៈពេល ៣ថ្ងៃ ចាប់ពីថ្ងៃទី៣សីហា។ នាយករដ្ឋមន្ត្រីនៃរដ្ឋគូវ៉េត បានដឹកនាំគណៈប្រតិភូគូវ៉េតមួយក្រុមមកដល់ទីក្រុងភ្នំពេញតាមជើងយន្តហោះពិសេសរបស់រដ្ឋគូវ៉េត កាលពីរសៀលថ្ងៃអាទិត្យម្សិលមិញ។
តាមកម្មវិធី នៅព្រឹកថ្ងៃចន្ទនេះ អ្នកអង្គម្ចាស់ ស្ហេក ណាស្សែរ អាល់សាបា ត្រូវដឹកនាំគណៈប្រតិភូចូលជួបប្រធានព្រឹទ្ធសភា លោក ជា ស៊ីម មុនពេលដែលប្រមុខរដ្ឋាភិបាលកម្ពុជា-គូវ៉េត បើកកិច្ចពិភាក្សាទល់មុខនៅក្រសួងការបរទេស។ ខណៈដែលនាយករដ្ឋមន្ត្រីកម្ពុជា-គូវ៉េត ជួបពិភាក្សាគ្នានៅព្រឹកនេះ គណៈប្រតិភូអ្នកពាណិជ្ជកម្មគូវ៉េតមួយក្រុម ក៏ត្រូវជួបប្រជុំពីរឿងពាណិជ្ជកម្មឆ្លងដែនជាមួយនិងសភាពាណិជ្ជកម្មកម្ពុជាផងដែរ។ លោកឧបនាយករដ្ឋមន្ត្រី ហោ ណាំហុង គូសបញ្ជាក់ថា៖ "ក្នុងពេលចរចានៅព្រឹកនេះជាមួយប្រមុខរដ្ឋាភិបាលគូវ៉េត យើងនឹងលើកឲ្យមានកិច្ចសហប្រតិបត្តិការលើការស្រាវជ្រាវរុករកប្រេង"។
ទស្សនកិច្ចផ្លូវការរបស់នាយករដ្ឋមន្ត្រីគូវ៉េមកកាន់កម្ពុជាពេលនេះ បានត្រូវលោកឧបនាយករដ្ឋមន្ត្រី ហោ ណាំហុង ជឿជាក់ថា នឹងនាំមកនូវការពង្រឹងមិត្តភាពរវាងកម្ពុជាជាមួយប្រទេសគូវ៉េត ក៏ដូចជាពង្រឹងមិត្តភាពជាមួយប្រទេសអារ៉ាប់ផ្សេងទៀត។ លោកឧបនាយករដ្ឋមន្ត្រី ហោ ណាំហុង បានបន្ថែមថា៖ "ទស្សនកិច្ចរបស់នាយករដ្ឋមន្ត្រីគូវ៉េតនេះ នឹងនាំមកនូវកិច្ចសហប្រតិបត្តិការដ៏មានផ្លែផ្ការវាងកម្ពុជា និងគូវ៉េត។ គូវ៉េតដែលជាប្រទេសតូច តែជាប្រទេសមហាសេដ្ឋីប្រេង"។
គូវ៉េត ជាប្រទេសនៅឈូងសមុទ្រអារ៉ាប់ទី២ ហើយដែលបានមកទស្សនកិច្ចផ្លូវការនៅកម្ពុជា។ កាលពីថ្ងៃទី១ ខែមេសា ដើមឆ្នាំនេះ កម្ពុជាបានទទួលនូវដំណើរទស្សនកិច្ចរបស់ប្រមុខរដ្ឋាភិបាលប្រទេសកាតា ដែលជាប្រទេសមហាសេដ្ឋីប្រេងកាតដ៏មហាសាល។ ប្រមុខរដ្ឋាភិបាលកម្ពុជា-រដ្ឋកាតា កាលណោះក្រៅពីចុះកិច្ចព្រមព្រៀងបើកឲ្យមានជើងហោះហើរដោយត្រង់ពីកាតាមកកាន់ទីក្រុងភ្នំពេញកម្ពុជា-កាតាក៏បានព្រមព្រៀងធ្វើកិច្ចសហការលើការរុករកប្រេង និងឧស្ម័នផងដែរ៕