កម្ពុជា​និង​ឥណ្ឌូណេស៊ី​គ្រោង​ចុះ​កិច្ច​សហប្រតិបត្តិការ​លើ​វិស័យ​ច្បាប់​

ភ្នំពេញ: ប្រទេស​កម្ពុជា​និង​ប្រទេស​ឥណ្ឌូណេស៊ី គ្រោង​ចុះ​កិច្ចព្រមព្រៀង​សហប្រតិបត្តិការ​លើ​វិស័យ​ច្បាប់ ដើម្បី​ផ្លាស់ប្ដូរ​ទណ្ឌិត​រវាង​ប្រទេស​ទាំងពីរ​ឱ្យ​កាន់តែ​ប្រសើរ ឡើង​សំដៅ​ធ្វើ​យ៉ាងណា​ប្រឆាំង​នឹង​ឧក្រិដ្ឋជន​ឆ្លងដែន​។​    ​

អ្នកនាំពាក្យ​ក្រសួងយុត្តិធម៌ លោក ជិន ម៉ាលីន បាន​ប្រាប់​អ្នកកាសែត​បន្ទាប់ពី​ជំនួប​រវាង​លោក អង្គ វង្ស​វឌ្ឍានា រដ្ឋមន្ត្រី​ក្រសួងយុត្តិធម៌​ជាមួយ​លោក​ពី​តូ​នូ ពួរ​នូ​ម៉ូ​( Pitono Purnomo) ឯកអគ្គរដ្ឋទូត​ឥណ្ឌូណេស៊ី​នា នៅ​ទីស្ដីការ​ក្រសួងយុត្តិធម៌​កាលពី​រសៀល​ថ្ងៃ​ទី​៣០​ខែ​វិច្ឆិកា​ថា ប្រទេស​ទាំងពីរ គ្រោង​នឹង​មាន​កិច្ច​ព្រមព្រៀង​ទ្វេភាគី​មួយ   ដើម្បី​ធ្វើ​កិច្ច​សហ​ប្រតិបត្តិការ​រវាង​គ្នា​នឹង​គ្នា​ក្នុង​ការ​បញ្ជូន​ឬ​ផ្ទេរ​ទណ្ឌិត​ទ្វេភាគី ។ គម្រោង​នេះ​គេ​មិនទាន់​ដឹង ថា នឹង​ចេញ​នៅ​ពេល​ណា​នៅឡើយ​ទេ    ប៉ុន្តែ​យ៉ាងណា​ក្រសួង​នឹង​ខិតខំ​ជំរុញ​ក្នុង រឿង​នេះ​ឱ្យ​បាន​ឆាប់​។​

លោក​បន្ត​ថា​ គម្រោង​ក្នុង​ការ​បង្កើត​កិច្ច​ព្រមព្រៀង​នេះ​ឡើង​ ដើម្បី​ដោះស្រាយ​នៅ​ពេល​មាន​ជនល្មើស​ប្រព្រឹត្ត​នៅ​ប្រទេស​ឥណ្ឌូណេស៊ី​រត់​មក​កម្ពុជា​ ភាគី​ឥណ្ឌូណេស៊ី​អាច​ស្នើ​ឱ្យ​កម្ពុជា​ បញ្ជូន​អ្នក​ទោស​នោះ​ដើម្បី​ធ្វើ​នីតិវិធី​ច្បាប់​មួយ​ចំនួន​ ដូចជា​ធ្វើ​បត្យាប័ន​ជា​ដើម​។ ជាមួយ​កិច្ច​ព្រមព្រៀង​នេះ​ដែរ​ គឺ​ដើម្បី​ដោះស្រាយ​បញ្ហា​មួយ​ទៀត​ ដូច​ជា​ជនជាតិ​ឥណ្ឌូណេស៊ី​  ដែល​ប្រព្រឹត្ត​បទ​ល្មើស​ដោយ​​តុលាការ​កម្ពុជា​ក្នុង​គោលបំណង​ជំរុញ​នីតិវិធី​បាន​លឿន​ចប់​សព្វ​គ្រប់​តាម​នីតិវិធី​ច្បាប់​។

លោក​បាន​បន្ថែម​ថា​ "ជា​ទូទៅ​​កម្ពុជា​ បាន​ធ្វើ​កិច្ច​ព្រមព្រៀង​ទ្វេ​ភាគី​មួយ​ផ្នែក​ផ្សេង​ទៀត​ ជាមួយ​បណ្ដា​ប្រទេស​ អាស៊ាន​ ដើម្បី​ឱ្យ​មាន​ការ​អនុវត្តន៍​ឱ្យ​កាន់​តែ​លឿន​ និង​ច្បាស់លាស់។​ កិច្ច​ព្រមព្រៀង​នេះ​ដែរ គឺ​ដើម្បី​ជួយ​សម្រួល​ដល់​ករណី​ជនល្មើស​​ឥណ្ឌូណេស៊ី​​មក​រកស៊ី​នៅ​កម្ពុជា​ យើង​អាច​ជួយ​សម្រួល​នីតិវិធី​​មួយ​ចំនួន​ហើយ​ក្នុង​ករណី​ជនជាតិ​ឥណ្ឌូណេស៊ី​រកស៊ី​នៅ​កម្ពុជា​ក្នុង​ការ​សហការ​គ្នា​រវាង​​គ្នា​នឹង​គ្នា​។

លោក​ថ្លែង​សង្កត់​ធ្ងន់​ថា​ ​កិច្ច​ព្រមព្រៀង​ទ្វេភាគី​នឹង​ផ្ដល់​ផល​ប្រយោជន៍​ឱ្យ​គ្នា​ទៅវិញទៅមក​រវាង​កម្ពុជា​ និង​ឥណ្ឌូណេស៊ី​ ដូចជា​ក្នុង​ករណី​ដែល​ជនជាតិ​ខ្មែរ​ប្រព្រឹត្ត​បទ​ល្មើស​នៅ​ឥណ្ឌូណេស៊ី​សមត្ថកិច្ច​ឥណ្ឌូណេស៊ី​​នឹង​ចាប់​បញ្ជូន​មក​កម្ពុជា​​ នឹង​ក្នុង​ករណី​  ដែល​ជនជាតិ​​ឥណ្ឌូណេស៊ី​ប្រព្រឹត្ត​បទ​ល្មើស​នៅ​កម្ពុជា​សមត្ថកិច្ច​កម្ពុជា​ នឹង​ចាប់​បញ្ជូន​ទៅ​ឥណ្ឌូណេស៊ី​។​ ជាង​នេះ​កិច្ច​ព្រមព្រៀង​នេះ​ជា​យន្តការ​ ដែល​អនុវត្ត​រវាង​ប្រទេស​ទាំង​ពីរ​ កម្ពុជា​ ឥណ្ឌូណេស៊ី​បាន​ល្អ​ ប្រសើរ​និង​ទទួល​បាន​ផល​ប្រយោជន៍​ច្រើន​ឡើង​បន្ថែម​ទៀត​។​

 

Category:

ប្រភព​ព័ត៌មាន: 
កាសែតរស្មីកម្ពុជា
បោះពុម្ព​ផ្សាយ: 
ឆ្នាំ​ទី​២៣​ លេខ​ ៦៨៨៩​ ថ្ងៃ​ ពុធ​ ទី​០២​ ខែ​ធ្នូ​