ផ្ដន្ទាទោស​បុរស​ម្នាក់​ដែល​ទះកំផ្លៀង​សិស្សសាលា​ដាក់ពន្ធនាគារ​១​ឆ្នាំ​

ភ្នំពេញ:  សិស្សស្រី​ម្នាក់​រៀន នៅ​វិទ្យាល័យ​ជាស៊ីម​បឹង​កេងកង ដែល មានទំនាស់​ជាមួយ​សិស្សស្រី​ដូចគ្នា រួច ត្រូវ​ឪពុក​សិស្សស្រី​នោះ​ទះ​មួយ​កំផ្លៀង បណ្ដាលឱ្យ​រងរបួស​ស្រាល បាន​ត្រូវ សាលាដំបូង​រាជធានី​ភ្នំពេញ​ប្រកាស សាលក្រម កាលពី​រសៀល​ថ្ងៃទី​២១ ខែកញ្ញា ឆ្នាំ​២០១៥ ផ្ដន្ទាទោស​ដាក់​ពន្ធ នាគារ​១​ឆ្នាំ តែ​អនុវត្ដ​ទោស​៣​ខែ និង ពិន័យ​ជា​ប្រាក់​២​លាន​រៀល ពីបទ​ហិង្សា ដោយ​ចេតនា ។​

​    ​ជនជាប់ចោទ​ឈ្មោះ​ទេព ឃួន អាយុ​៤៩​ឆ្នាំ ត្រូវបាន​សមត្ថកិច្ច​ឃាត់ខ្លួន កាលពី​ថ្ងៃទី​១ ខែកក្កដា ឆ្នាំ​២០១៥ នៅ ចំណុច​វិទ្យាល័យ​ជាស៊ីម​បឹង​កេងកង ក្នុងខណៈ​ពេលដែល​បុរស​រូប​នោះបាន មក​ទះកំផ្លៀង​សិស្សស្រី ។​

​    ​មូលហេតុ​នៃ​រឿងនេះ​គឺ​មុន ពេល​កើតហេតុ​កូនស្រី​ជនសង្ស័យ​បាន ឈ្លោះប្រកែក​គ្នា​ជាមួយ​ជនរងគ្រោះ ហើយ​បាន​ទូរស័ព្ទ​ប្រាប់​ឪពុក​ឈ្មោះ ទេព ឃួន ឱ្យមក​ជួយ​អន្ដរាគមន៍ ។ ពេល នោះ​ឈ្មោះ​ទេព ឃួន បានមក​ដល់​ទះ កំផ្លៀង​ជនរងគ្រោះ​មួយ​ដៃ ។​

​    ​ក្រោយ​ការឃាត់ខ្លួន សមត្ថកិច្ច បាន​បញ្ជូន​បុរស​រូបនេះ​មក​តុលាការ ហើយ​ត្រូវបាន​តុលាការ​សម្រេច​ឃុំខ្លួន បណ្ដោះអាសន្ន ។ បន្ទាប់ពី​ជាប់​មួយ រយៈពេល​ខ្លី ក្រុមគ្រួសារ​ជនរងគ្រោះ បាន​ដក​ពាក្យបណ្ដឹង​វិញ​បន្ទាប់ពី​ទទួល សំណង​រួចមក ៕