អន្តរាគមន៍​ជួយ​ស្ដ្រី​ខ្មែរ ៥​នាក់ ឲ្យ​ត្រឡប់​ពី​ប្រទេស​ចិន​មក​កម្ពុជា នៅ​ថ្ងៃស្អែក

ភ្នំពេញ: នៅ​ថ្ងៃទី​១៧ ខែកញ្ញា ឆ្នាំ​២០១៥ លោក ជុំ សុន្ទរី អ្នកនាំពាក្យ​ក្រសួងការបរទេស និង​សហប្រតិបត្តិការ​អន្តរជាតិ បាន​ឲ្យ​ដឹងថា ស្ថាន​ឯកអគ្គរាជទូត​កម្ពុជា​ប្រចាំ​សាធារណរដ្ឋ​ប្រជាមានិត​ចិន បាន​សហការ​ជាមួយ​អាជ្ញាធរ​ចិន អន្តរាគមន៍​ជួយ​ស្ដ្រី​ខ្មែរ​រងគ្រោះ​ចំនួន​៥​នាក់ ដែល​ត្រូវបាន​មេខ្យល់​លួងលោម​បោក​បញ្ឆោត​នាំយកទៅ​រៀបការ​ជាមួយ​បុរស​ជនជាតិ​ចិន ហើយ​ត្រូវបាន​ប្តី​ធ្វើបាប ឲ្យ​បាន​វិល​ត្រឡប់មក​កម្ពុជា​វិញ​។  

​​      ប្រភព​បាន​ឲ្យ​ដឹងថា ស្ដ្រី​ខ្មែរ​រងគ្រោះ​ទាំង ៥​នាក់ មានឈ្មោះ ៖ ១-​យេន ស៊ី​ម៉ា នៅ​ភូមិ​អណ្ដូង​ស្នាយ ឃុំ​ព្រែកកក់ ស្រុក​ស្ទឹងត្រង់ ខេត្តកំពង់ចាម​។ ២- ផាត ដា​រី នៅ​ភូមិ​ក្ដុល​ក្រោម ឃុំ​ទ្រា ស្រុក​ក្រូចឆ្មារ ខេត្តកំពង់ចាម។ ៣- ផាត ធីតា នៅ​ភូមិ​ក្ដុល​ក្រោម ឃុំ​ទ្រា ស្រុក​ក្រូចឆ្មារ ខេត្តកំពង់ចាម​។ ៤- នាង ស្រី​ដា នៅ​ភូមិ​ពពា​ខែ ឃុំ​ដីឥដ្ឋ ស្រុក​កៀនស្វាយ ខេត្តកណ្ដាល និង​៥- ព្រំ កុសល  នៅ​ភូមិ​ពពា​ខែ ឃុំ​ដីឥដ្ឋ ស្រុក​កៀនស្វាយ ខេត្តកណ្ដាល។​

​      ប្រភព​បាន​បន្តថា ស្ត្រី​ខ្មែរ​រងគ្រោះ​ទាំង​៥ ខាងលើ នឹង​មកដល់​អាកាសយានដ្ឋាន​អន្តរជាតិ​ភ្នំពេញ នៅ​ថ្ងៃទី ១៨ ខែ កញ្ញា ឆ្នាំ ២០១៥ វេលា​ម៉ោង ១០: ២០ នាទី ព្រឹក តាម​ជើងយន្តហោះ MH 754។ 

       ​គួរ​កត់សំគាល់ថា ករណី​ស្ដ្រី​ខ្មែរ​រៀបការ​ជាមួយ​បុរស​ជនជាតិ​ចិន និង​ត្រូវបាន​ប្តី​វាយ​ធ្វើបាប ហើយ​ស្ថានទូត និង​ស្ថាន​អគ្គ​កុងស៊ុល​កម្ពុជា អន្តរាគមន៍​ជួយសង្គ្រោះ អោយ​វិល​ត្រឡប់មក​កម្ពុជា​វិញ បាន​កើតឡើង​សឹងតែ​ជា​រៀងរាល់ថ្ងៃ​។ 

       ​ក្រសួងការបរទេស និង​សហប្រតិបត្តិការ​អន្តរជាតិ ក៏​ធ្លាប់បាន​អញ្ជើញ​សាមីខ្លួន ដែល​បាន ដាក់ពាក្យ​សុំច្បាប់​អនុញ្ញាត​រៀបការ​ជាមួយ​បុរស​ជនជាតិ​ចិន មក​ជំរាបជូន​ពី​ហានិភ័យ​ដែល​បាន និង​កំពុង​កើតមាន​ចំពោះ​ស្ដ្រី​ខ្មែរ​ក្នុងពេល​បច្ចុប្បន្ន​ដើម្បី​ពួកគេ​បានដឹង ក្នុង​គោលបំណង​អោយ ធ្វើការ​ត្រិះរិះ​ពិចារណា​អោយបាន​ហ្មត់ចត់​។​

        លើសពីនេះ ក្រសួងការបរទេស និង​សហប្រតិបត្តិការ​អន្តរជាតិ តែងតែ​ធ្វើការ​អំពាវនាវ​ជា ញឹកញាប់​ដល់​មាតាបិតា អាណាព្យាបាល និង​ស្ត្រី​ខ្មែរ​ដែលជា​ជន​ងាយ​រងគ្រោះ អោយ​ចាប់អារម្មណ៍ និង​យកចិត្តទុកដាក់​ឲ្យ​បាន​ខ្ពស់​ចំពោះ​បញ្ហា​នេះ ហើយ​ត្រូវមាន​ការប្រុងប្រយ័ត្ន​ចំពោះ​ការ​លួងលោម ភូតកុហក ឆបោក អូសទាញ ប​ញ្ជុះ​ប​ញ្ជូ​ល​របស់​ពួក​មេខ្យល់ ដែលមាន​គំនិត​ទុច្ចរិត​ទាំងនោះ​៕

Tags:

ប្រភព​ព័ត៌មាន: 
កាសែតរស្មីកម្ពុជា
បោះពុម្ព​ផ្សាយ: 
ថ្ងៃទី១៨​ខែកញ្ញា​ឆ្នាំ២០១៥