សទ្ទានុក្រម

ពាក្យ	និយមន័យ
ការស្រាវជ្រាវលើប្រធាបបទផ្នែកយេនឌ័រ	ផ្ដោតការយកចិត្តទុកដាក់ទៅលើយេនឌ័រផ្ទាល់ ជាកម្មវត្ថុនៃការសិក្សា។ ការស្រាវជ្រាវលើប្រធាបបទផ្នែកយេនឌ័រ ឬការសិក្សាផ្នែកយេនឌ័រ សង្កត់ធ្ងន់ទៅលើភាពងងឹតផ្នែកយេនឌ័រ នៅក្នុងវិទ្យាសាស្រ្ត ដើម្បីបង្ហាញឲ្យឃើញថា ផលិតផលផ្នែកចំណេះដឹងរបស់វិទ្យាសាស្រ្ត (សូម្បីតែក្នុងវិទ្យាសាស្រ្តធម្មជាតិក្ដី) គឺសុទ្ធតែរងឥទ្ធិពល ពីទស្សនៈផ្នែកយេនឌ័ររបស់អ្នកស្រាវជ្រាវ និងនៅក្នុងវិស័យស្រាវជ្រាវ។ ការសិក្សាផ្នែកយេនឌ័រ វិភាគទៅលើទំនាក់ទំនងយេនឌ័រនៅក្នុងអតីតកាល បច្ចុប្បន្នកាល អនាគតកាល។ ការស្រាវជ្រាវទាំងនេះ ជួយពង្រឹកការយល់ដឹងអំពីដំណើរការសង្គម។ ហេតុនេះ ការស្រាវជ្រាវបែបនេះ ចូលរួមវិភាគទានក្នុងការផ្ដល់ដំណោះស្រាយចំពោះបញ្ហាសំខាន់ៗ ដែលសង្គមកំពុងប្រឈមសព្វថ្ងៃ។ ឧទាហរណ៍មួយអំពីការស្រាជ្រាវប្រភេទនេះគឺ៖ ដើម្បីកំណត់អំពីការរើសអើងផ្នែកយេនឌ័រ នៅក្នុងទីផ្សារពលកម្មក្នុងប្រទេសកម្ពុជា។
ការបញ្ជ្រាបយេនឌ័រ	យុទ្ធវិធីនៃការដាក់បញ្ចូលកង្វល់ពាក់ព័ន្ធនឹងយេនឌ័រទៅក្នុងការ វិភាគ ការរៀបចំ និងការតាមដានត្រួតពិនិត្យ ទៅលើគោលនយោបាយ កម្មវិធី និងគម្រោងអភិវឌ្ឍនានា ដើម្បីធានាថា វិសមភាព និងគម្លាតយេនឌ័រត្រូវបានកាត់បន្ថយ។
ការបៀតបៀនរំខានផ្លូវភេទ	ការបៀតបៀនរំខានផ្លូវភេទ ជាការប្រព្រឹត្តដោយបំពានរបស់បុគ្គលមួយទៅលើបុគ្គលមួយទៀតដែល ទាក់ទងនឹងផ្លូវភេទ។ ការបៀតបៀនរំខានផ្លូវភេទស្ដែងឡើងតាមរូបភាពផ្សេងៗ ដូចជា ពាក្យសម្ដី អាកប្បកិរិយា រហូតដល់ការគំរាមរំលោភសេពសន្ធវៈដោយគ្មានការព្រមព្រៀង។ ជាទូទៅ អ្នកដែលបៀតបៀនរំខានផ្លូវភេទច្រើនតែជាបុរស។
ការប៉ាន់ប្រមាណផលប៉ះពាល់ទៅលើយេនឌ័រ	ការប៉ាន់ប្រមាណអំពីផលប៉ះពាល់នៃគោលនយោបាយ ឬគម្រោងអភិវឌ្ឍនានាដើម្បីឱ្យឃើញថា តើគោលនយោបាយឬគម្រោងអភិវឌ្ឍនោះនឹងជះឥទ្ធិពលទៅលើបុរសនិងស្ត្រី តាមរូបភាពបែបណា។ លទ្ធផលនៃការប៉ាន់ប្រមាណនោះត្រូវបានគេប្រើប្រាស់ ដើម្បីធ្វើការកែប្រែឱ្យធានាបានថា ឥទ្ធិពលនៃភាពរើសអើងយេនឌ័រត្រូវបានកាត់បន្ថយ ហើយសមភាពយេនឌ័រត្រូវបានលើកកំពស់។
ការផ្ដល់ភាពអង់អាចដល់ស្ត្រី	ដំណើរការក្នុងការជួយស្ត្រីខាងផ្នែកសង្គមកិច្ច សេដ្ឋកិច្ច នយោបាយ មនោគមវិជ្ជា និងច្បាប់ ដើម្បីឱ្យស្ត្រីអាចនឹងធ្វើសកម្មភាពក្នុងការពង្រឹងសិទ្ធិ សមត្ថភាព និងទទួលបាននូវសេវាកម្មនិងគ្រប់គ្រងលើធនធាន និងការចូលរួមដោយស្មើភាពនៅក្នុងកិច្ចការដែលពីមុនគេហាមឃាត់ ឬកម្រិតស្ត្រីមិនឱ្យចូលរួម។ បែបផែនផ្សេងៗគ្នានៃការទទួលបាននូវអំណាច និងការគ្រប់គ្រងធនធាននានាដោយស្ត្រី និងបុរស គឺជាលក្ខណៈសំគាល់ជាគន្លឹះមួយសម្រាប់ជាមូលដ្ឋាននៃការបែងចែក ពលកម្មតាមយេនឌ័រ។
ការផ្ដល់អំណាចផ្នែកយេនឌ័រ	ការផ្ដល់អំណាចផ្នែកយេនឌ័រ គឺជាដំណើរការនៃការកសាងសមត្ថភាពមនុស្សទាំងប្រុស ទាំងស្រី ឲ្យអាចគ្រប់គ្រងលើជីវិតរបស់ខ្លួនឯង កំណត់នូវរបៀបវារៈរបស់ខ្លួនឯង ទទួលបានជំនាញ សាងទំនុកចិត្ត ដោះស្រាយបញ្ហា និងអភិវឌ្ឍនូវស្វ័យពឹងផ្អែក (ប្រភពឯកសារ៖ កញ្ចប់ឧបករណ៍យេនឌ័រក្នុងបណ្ដាញអប់រំ (GENIA))។ ការផ្ដល់អំណាច មានន័យថា ជាការបង្កើនធនធាន និងសមត្ថភាពរបស់បុគ្គល ឬក្រុមមនុស្សដើម្បីជះឥទ្ធិពល និងសម្រេចចិត្តទៅលើបញ្ហានានាទាក់ទងនឹងជីវិតរបស់ពួកគេ។ ការបង្កើនអំណាចរបស់មនុស្ស ដើម្បីគ្រប់គ្រងលើជីវិតរបស់ខ្លួនឯង គឺជាដំណើរការមួយនៃការផ្លាស់ប្ដូរ ទាំងផ្នែកខាងក្នុង និងខាងក្រៅ។ ការផ្ដល់អំណាច ជួយជម្រុញសមត្ថភាពដល់ក្រុមដែលកាលពីមុនធ្លាប់តែស្ថិតក្នុងឋានៈទន់ខ្សោយជាង (ឧទាហរណ៍ ស្ត្រី ឬជនពិការ) ឲ្យអាចត្រៀមខ្លួនបានកាន់តែប្រសើរជាងមុន និងបំពាក់នូវសមត្ថភាពដែលចាំបាច់ដើម្បីចូលរួមក្នុងការសម្រេចចិត្តនានាដែលអាចប៉ះពាល់ដល់ខ្លួន និងសហគមន៍របស់ខ្លួន។ បើឈរលើទស្សនវិស័យសមភាពយេនឌ័រ ក្រុមចំបងបំផុតដែលត្រូវការការផ្ដល់អំណាច គឺស្ត្រី និងកុមារ ព្រោះនៅក្នុងសង្គម ពួកគេតែងស្ថិតនៅក្នុងឋានៈទន់ខ្សោយជាងបុរស ស្ទើរគ្រប់ពេលវេលា។
ការយល់ដឹងអំពីយេនឌ័រ	ការយល់ដឹងអំពីភាពខុសគ្នារវាងបុរសនិងស្ត្រី ដែលសង្គមបានកំណត់ឡើងដោយឈរលើចំណេះដឹងស្ដីពីអាកប្បកិរិយានានា ដែលជះឥទ្ធិពលទៅលើសមត្ថភាពនៃការទទួលបាន និងការគ្រប់គ្រងធនធាន ឱកាស និងផលប្រយោជន៍។
ការរើសអើងផ្នែកយេនឌ័រ	គឺជាការប្រព្រឹត្តិជាប្រព័ន្ធ មិនអំណោយផលចំពោះបុគ្គលណាមួយ ដោយឈរលើមូលដ្ឋាននៃយេនឌ័ររបស់បុគ្គលនោះ ដែលជាការបដិសេធនូវសិទ្ធិ ឱកាស ឬធនធានរបស់ពួកគេ។ នៅទូទាំងពិភពលោក ស្ត្រីបានទទួលការប្រព្រឹត្តិដោយមិនស្មើរភាពចំពោះខ្លួន ហើយមានការផ្ដល់តម្លៃទាបចំពោះជីវិតរបស់ពួកគេ អាស្រ័យដោយយេនឌ័ររបស់ពួកគេ។ ភាពមិនដូចគ្នានៃលទ្ធភាពរបស់ស្ត្រី ក្នុងការទទួលបានអំណាច និងគ្រប់គ្រងលើធនធាន គឺជាចំណុចស្នូលនៃការរើសអើងនេះ នៅក្នុងវិស័យស្ថាប័នទាំងអស់ រួមមានគ្រួសារ សហគមន៍ ទីផ្សារ និងរដ្ឋ។
ការរើសអើងយេនឌ័រ	ការឱ្យតម្លៃនិងការប្រព្រឹត្តខុសគ្នាទៅលើបុគ្គលណាមួយ ដោយផ្អែកទៅលើមូលដ្ឋានយេនឌ័ររបស់បុគ្គលនោះ។ នៅក្នុងសង្គមបិតាធិបតេយ្យ គឺមានការរើសអើង ដែលមានលក្ខណៈជាប្រព័ន្ធនិងរៀបរយប្រឆាំងនឹងស្ត្រីនៅក្នុងការ បែងចែកប្រាក់ចំណូលក្នុងការទទួលធនធាន និងការចូលរួមនៅក្នុងការសម្រេចចិត្ត។
ការវិភាគផលប៉ះពាល់ទៅលើយេនឌ័រ	ការវិភាគពីការជះឥទ្ធិពលនៃគោលនយោបាយ ឬកម្មវិធីមួយទៅលើបុរសនិងស្ត្រី តាមរូបភាពផ្សេងគ្នា។

Pages

ក ខ គ ឃ ង ច ឆ ជ ឈ ញ ដ ឋ ឌ ឍ ណ ត ថ ទ ធ ន ប ផ ព ភ ម យ រ ល វ ស ហ ឡ អ

២០០៧-២០១០ រាល់មាតិកានិងឯកសារដែលជាកម្មសិទ្ធិរបស់អង្គការវិទ្យាស្ថានបើកទូលាយត្រូវបានផ្តល់អាជ្ញាប័ណ្ណក្រោមអាជ្ញាប័ណ្ណ
Creative Commons Attribution-Noncommercial-Share Alike 3.0 License. បើមិនដូច្នោះទេ មាតិកា និងឯកសារទាំងនោះជាកម្មសិទ្ធិរបស់អ្នកនិពន្ធ។